A vawi 50 nan Klopp a chak

Pathianni zan Premier League inkhelah Liverpool chuan 2-0 in Southampton an hneh a, Jurgen Klopp-a'n Premier League-ah Reds vawi 50 a chakpuina chiah a ni.

German coach hian vawi 50 chak result hlawh chhuak tur hian match 95 a mamawh a, Brendan Rodgers-a'n Liverpool-a league match 50 chak tling tura a match mamawh zat nen a in ang chiah!

St Mary's Stadium-a inkhelah hian Liverpool tan Roberto Firmino chuan minute rukna lekah goal hmahruai a khung a, Mohamed Salah chuan minute 42-naah an goal hnihna a khung ve leh bawk - Reds forward pahnih hian an goal khung hi an insiam sak ve ve a, Salah goal khungna tura an ball inpe kual chu hmuhnawm tak a ni. 

Reds tan Firmino-a'n tun season-ah goal 20 a khung tling der tawh a, Salah tan match 36-a a goal 29-na a ni thung - player pahnih an chet ṭhat chhunzawm zel leh zel lohin thui takin Liverpool hma hun a hril ang.

Pound maktaduai 75-a Liverpool pantu Virgil van Dijk-a'n St Mary's a chhuahsan hnua a vawi khat nan a club hlui a hmachhawn a, Saints fan-ten Dutch defender hi au el ṭhin mah se an hmuh chu an hmuh ṭhin Van Dijk tho a ni - Netherlands international a khel ṭha a, boruak sangah a buai lo a, Liverpool tlarhnung innghahna a ni.

Reds goalkeeper Loris Karius a che ṭha a, Klopp-a'n a keeper pahnih a inkhelh chhawk tir danah Nilaini zana Champions League-ah Simon Mignolet inlan hun ni mah se Karius khelh dan enin a ngaihdan a thlak a nih pawhin a mak lo ang - Liverpool hian tun season-a nomawi an beisei theih awmchhun chu Champions League chiah a ni tawh.

Liverpool boss Klopp chuan, "Khel ṭha tak kan ni hran lo a, kan ruahman angin engkim a kal diak diak lo. Mahse, hun harsaah pawh kan hna kan hlen avangin ka lawm a ni," tiin a sawi.



Share this Post

Login to comment
No Comments