Amir Khan a lo kir dawn

WBA leh IBF light-welterweight world champion hlui Amir Khan chuan kum hnih ngawt boxing khawvela a hmel a lan tawh loh hnuah a lo kir leh dawn ta a, Liverpool khawpuia Echo Arena-ah April 21 khian a inhnek ang. 

Kum 31 mi boxer hian May 2016 khan Saul Alvarez chu a inhnekpui a, WBC middleweight title inchuhnaah Mexican boxer hian a knockout.  April 2017 khan boxer ropui Manny Pacquiao nen inhnek tura tih an ni leh a, mah se Philippines boxer nena an inhnek tur pawh hi ṭhulh leh a ni. 

Amir Khan promoter Eddie Hearn chuan, "Inhnek hmuhnawm leh nghahhlelhawm tak chhawpchhuah kan tum a, Manny Pacquiao, Kell Brook, Keith Thurman leh Errol Spence te zinga a hmachhawn theih ber tur kan buaipui mek," tiin hming a lam hrawl hle. 

Vawi 35 inhnek a hmachhawna vawi 31 hnehna chang thei Khan chuan, "Kan hma hun atan ka phur takzet a, tunah hian ka in fit-in ka tha a za em em a, ring chhunga luh leh hlan ka nghakhlel hle a ni," tiin a sawi ve bawk.

Ruahman anga engkim a kaltluan chuan Bolton khaw chhuak boxer hian August emaw September-ah fight a hmachhawn leh ang a, Hearn chuan hei hi 2018 thlasik laia fight ropui chungchuang an hmachhawn tur atana inbuatsaihna tur a nih thu a sawi.



Share this Post

Login to comment
No Comments