BBC African Footballer of the Year Salah

Liverpool forward Mohamed Salah chu BBC African Footballer of the Year-ah thlan a ni a, Egyptian winger hian he chawimawina dawng tur hian Borussia Dortmund striker Pierre-Emerick Aubameyang (Gabon), RB Leipzig midfielder Naby Keita (Guinea), Liverpool forward Sadio Mane (Senegal) leh Chelsea wing back Victor Moses (Nigeria) te a khum.

Salah chuan, "He chawimawina ka dawng thei hi ka lawm takzet a ni. Chawimawina eng emaw tak i dawng a nih chuan i thinlungah kum ṭha tak i hmang a ni tih hriatna a awm a, chu chuan min ti hlim a ni. Kum ṭha leh duhawm tak ka hmangah ka ngai a, ka lawm takzet a ni," tiin BBC-in African player ṭha bera an thlang chu a lawm thu a sawi. 

Egyptian Hero

Kum 2017 kum tir khan Salah hian Egypt chu Africa Cup of Nations-ah final a hruai thleng a, nomawi chawipui chiah lo mah se an player pawimawh a ni. Kum 1990 hnua a vawi khat nana World Cup khel tura an tlinna kawngah pawh player pawimawh a ni - goal sarih an khung zinga goal nga chu Salah khung a ni a, goal hnih dang hi a assist niin World Cup luh nemngheh nan Congo lakah hun pek belhah penalty a chhuih lut bawk. 

Egypt player zinga a pathumna leh 2008 hnua BBC African Footballer of the Year ni leh thei hmasa ber Salah chuan, "Egyptian player awm tawh zawng zawnga ṭha ber nih hi ka duh a, chumi tur chuan ka thawkrim em em bawk. Ka duh dan ang tak zelin ka kal a, Egypt mipuite tana entawntlak nih hi ka duh a ni," a ti.

Liverpool Hero

Kum 25 mi forward hian Liverpool tan league match 16-a khelhah goal 13 khungin top scorer a ni mek a, nipui transfer-a Reds a zawm hma season-ah khan Roma tan Serie A-ah goal 15 khungin assist 11 a nei a, pahnihna a nihpui thei. Salah chuan, "Liverpool-a ka khelhpuite chungah lawmthu ka sawi a, Roma-ah pawh khan season duhawm tak ka hman avangin Italian club-a ka khelhpuite chungah pawh ka lawm a, ram tana ka khelhpuite pawh lawmthu ka hrilh a ni," tiin a ṭhiante puihna avanga lawmman dawng thei a nih thu a sawi.

Salah chuan sawi chhunzawmin, "Premier League ka chhuahsan hnu khan he inelnaa lo kir leh hi ka duh reng ṭhin a, rim taka thawha ka theihna tak tak pholan hi ka duh ber ṭhin a nih avangin ka hlim takzet a ni," a ti.

Salah faktu Klopp

Liverpool boss Jurgen Klopp chuan, "Salah hian he chawimawina dawn hi a phu a ni. Player thiam tak tak ka thawhpui ṭhin avangin coach vannei tak ka ni a, Mo nena kan thawkdun thei ringawt pawh hi ka lawm takzet a ni. Player naupang tak a la nih avangin hma a la sawn zel dawn tih a chiang a, theihna sang tak nei a ni. Ani ka thawhpui thei hi ka inchhuang a ni," tiin a player chu a chhuang hle.

BBC African Footballer of the year chawimawina hi player langsar tak tak Jay-Jay Okocha (Nigeria), Didier Drogba (Ivory Coast) leh Michael Essien (Ghana) te pawhin an lo dawng tawh a, Egyptian player zingah Mohamed Barakat (2005) leh Mohamed Aboutrika (2008) ten lo dawng tawh bawkin Salah chuan, "An sulhnu chhui theia ka awm hi ka lawm a ni," tiin a sawi - Salah khelhna Liverpool hian zanin dar 1:30-ah Premier League match khel turin West Brom an mikhual ang.



Share this Post

Login to comment
No Comments