LS inthlan zawhah ramri chungchanga inbiakna neih tum

Meghalaya Chief Minister Conrad K Sangma chuan Lok Sabha inthlan zawh hunah Assam nen ramri chungchangah an inbe dawn tih a sawi.

Thawhlehni khan Assembly-a governor in thu a sawi zawha sawihona neih chhunzawmah Chief Minister,Conrad K Sangma chuan state ṭhenawm nena inter-state boundary an neih chinfelna tur chu Lok Sabha inthlan neih zawhah a nih dawn thu sawiin, Assam chu inbiakna neihpui ngei an tum tih a sawi a ni.

Corad K Sangma chuan state ramri chungchang chu mi tin tan thil sensitive tak leh hnuk khawih tak a ni tih sawiin, eng sorkar pawhin an la thutak hle tih a sawi. Buaina chinfel loha rei tawk awm tawh chu chingfel ngei turin hma an la dawn tih a sawi. Ramri-a cheng an mite chu humhim an nih theih nan sorkar pawhin hma a la ngei dawn tih a sawi bawk.

Home Minister James K Sangma pawhin a hmain Meghalaya Assembly-ah West Khasi Hills district-a Langpih huamchhunga Umwali thingtlang khuaah February 14 khan ramri chungchanga buaina chhuakte chu sawichhuakin, sorkar chuan a lak thutak thu leh Chief Secretary level-ah inbiakna neihpui an tum thu a sawi tawh a ni.

James K Sangma chuan an state Chief Secretary in Assam CS hnenah ramri a chengte ralmuang taka an awm theih nan leh hlau reng renga hun an hman lohna turin a mawhphurtute chak taka hma laktir tura a ngen thu a sawi bawk.

Sangma chuan February-a buaina chhuah hnu khan district thuneitute chuan Deputy Commissioner, Kamrup (Rural), Assam hnenah hemi chungchang hi an sawipui nghal tih sawiin Assam police, mawi lo taka che te hnenah pawh hremna lekkawh turin an ngen tih a sawi a ni.

February 22 pawh khan district administration Kamrup (Rural) hnenah hemi chungchang hi an sawipui tih sawiin, hmasawnna a awm thu leh buaina chinfelna turin hma lak a nih dawn thu a sawi.

Kumin February 14 khan Assam police-ten an vuak vangin thingtlang mi 28 chuan hliam an tuar a, hliam tuar zingah hian hmeichhia te pawh an tel a ni. MeECL contractor leh hnathawktu ten Umwali-ah hian DDUGJY scheme hnuaiah electric hrui an zam a, Assam police-te chuan an ram chin nia sawiin an inkarah buaina nasa tak a chhuak zui a ni.



Share this Post

Login to comment
No Comments