BJP Gen Secy in AGP thawhpui leh dan buaipui Tripura-ah pawh thawhhona zawng dawn

Bharatiya Janata Party (BJP) General Secretary Ram Madhav chuan a hmaa an thawhpui ṭhin Asom Gana Parishad (AGP) nena Lok Sabha inthalana thawhdun lehna tur a buaipui dawn nia tarlan a ni. 

Ram Madhav hian Thawhlehni khan Guwahati a thleng tawh a, nimin khan hmarchhak state hrang hranga party hruaitute meeting neihpui a tum nia tarlan niin, he thuziah lai hian thuchiang hriat a la ni lo thung. Madhav hian AGP pawh thawhho lehna tur chungchang sawia inbiakna neihpui a tum niin media ṭhenkhat chuan an tarlang.

AGP leh BJP hi 2016 Assam Assembly inthlanah khawn thawkdunin sorkar lai Congress an paihthla a ni a, mahse kumin January 7 khan Citizenship (Amendment) Bill, 2016 vangin AGP hian an thawhdunna hi an titawp a ni.

AGP hruaitu hlun tak pakhat chuan Thawhṭanni-a party meeting an neihah inthlan awm tur atana an hmalak dan turah thutlukna an siam tih sawiin, BJP nena thawhdunna chungchang erawh an sawi lo tih a sawi. Assam LS constituency 14 awmah 11-ah candidate neih an tum thu pawh a sawi.

AGP leader leh Assam Chief Minister hlui Prafulla Kumar Mahanta chuan a hriat chinah AGP chuan BJP nena thawhdun an duh lo tih a sawi a, LS inthlanah pawh an party chuan thawhpui nei lo se ṭha zawka a hriat thu a sawi bawk.

Hetihlai hian BJP leader leh Assam Finance Minister Himanta Biswa Sarma chuan Thawhlehni khan thawhdunna chu party pahnihte chuan an tihchian a ngai tih sawiin, a bulṭhutah party pahnih worker-te chu an inṭanpui tawn em tih an hriat a ngaih thu a sawi. Thawhdunna siam hmain thil awmdan hriatfiah phawt a ngai a ni, a ti.

Tripura lam:

BJP Gen Secy Ram Madhav hian nimin khan Tripura tlawh turin ruahmanna a siam nia tarlan niin, he thu ziah lai hian thuchiang hriat hman a ni lo thung.

BJP leader pakhat chuan Tripura party leader-te bia in LS inthlana thawhhona chungchang a sawipui dawn a, Indigenous Peoples Front of Tripura (INPT) leh Indigenous People's Front of Tripura (IPFT)-te pawh inbiakna a neihpui dawn tih a sawi. 

INPT hian tunhnai khan LS inthlanah thawhpui neih an tum loh thu sawi mah se BJP hian thawhhona chungchang hi sawipui tho an tum a ni.

Ram Madhav hi party prabhari Avinash Khanna Rai nen hmarchhakah an rawn zin a ni. 



Share this Post

Login to comment
No Comments