Nagaland-ah nomination paper 227 pawm, Meghalaya-ah 374 pawm thung

Election Official-te chuan kar kalta Ningani khan Nagaland Assemly inthlan tura chuh tuma nomination file thehlut zawng zawng zingah nomination 227 chu endik an nih hnuah pawm an nih thu an sawi.

Additional Chief Electorate Officer N. Moa Aier chuan nomination paper thehlut mi 257 an awm thu sawiin, uluk taka endik an nih hnuah nomination file zinga 227 chu an pawm thu sawiin, 29 chu an hnawl thu a sawi bawk.

Nagaland Assembly inthlana chuh tumte hian nimin thleng khan inhnuhdawh lehna hun an nei a, Suruhoto Assembly Constituency-a ding tur Kaito Jakhalu nomination paper erawh hekna a awm avangin an la tikhawtlai hrih a, he thu ziah lai hian an pawm leh pawm loh hriat a la ni lo a ni.

Nagaland Assembly inthlan hi February 27-a neih tur niin March 3-ah vote hi chhiar a ni ang. 

Meghalaya-ah ve thung chuan nomination paper 377 thehluh zingah Election official-te chuan nomination 374 an pawm thung. Paper endik hma khan nomination file tur hi mi 400 chuang an awm dawn nia sawi awm mah se an enfiah tak hi chu  paper 377 a ni.

Chief Electoral Officer Frederick Roy Kharkongor chuan candidate pathum - North East India Development Party (NEIDP) candidate Serazul H. Kharkongor leh Arelitha K Sangma bakah Aam Aadmi Party (AAP) candidate Milson Sangma-te chu nomination thehluh chu an hnawl thu a sawi.

Hetih lai hian Congress candidate George B. Lyngdoh chuan Umroi constituency-a ding tura nomination file tu National People’s Party candidate, Ngaitlang Dhar chu a hnathawh leh a sum lakluh zat a ziah chu a dik lo nia sawiin a lakah complaint a thehlut. 

Meghalaya nomination paper pawm zingah hian hmeichhe candidate 33 an tel a, Independent candidate 85 an awm bawk.

Seat 60 awmna Meghalaya Assembly inthlan hi February 27-a neih tur niin Macrh 3-ah vote chhiar a ni dawn a ni.



Share this Post

Login to comment
No Comments