Tripura-ah Blue Whale game vanga intihhlum tum awm leh

Tripura chhim lam, Agartala aṭanga km 100 vela hla Banshpadu khuaa mi, Santosh Debnath, kum 26 mi chu Blue Whale game avangin Zirtawpni khan a invit a, Belonia damdawiinah admit nghal a ni.

Santosh Debnath hian fa pahnih a nei tawh a ni. Belonia Sub-Divisional Police Officer (SDPO) Ratan Das sawi dan chuan Santosh hian chemte hmangin a pum a vit a, damdawiin panpui nghal a nih thu a sawi.

Santosh hian inthah a tum hma ni 16 kalta aṭang khan he game hi a khel tawh a, round 16 zo tawhin game administrator hian dil-a zuangthla a mahni inthat turin a ti a, dila a zuanthlak hma hian amah a invih hmasak thu, Das chuan a sawi bawk.

SDPO chuan a awmdan mak tak avang hian a ṭhiante chuan Santosh-a mobile phone hi an endiksak thu leh, he game hlauhawm tak hi a khel a ni tih hmuhchhuah a nih thu a sawi a ni. Thla khat leh a chanve kalta khan college kal lai nula pakhat pawh a banah 'Blue Whale' lem a ziah avangin councelling pek a ni a, he game hi a khel ngei a ni tih hriatchhuah alo ni tawh bawk a ni. 

Hmarchhak dang Assam-ah pawh online game Blue Whale Challege avang hian zir ai mahni intihhlum tum eng emaw zat an awm tawh a, state sorkar chuan he game laka fimkhur tur hian hriattirna a chhuah hial a ni. Sorkar hmalaknain zirna-in hrang hrangah campaign neih a ni a, he game ṭhat lohna leh hlauhawmna hrang hrangte tarlan ṭhin a ni. State ṭhekhat chuan he game khelh khapna hi an tichhuak hial a, ram ṭhenkhat pawhin an khap hlawm a ni. 



Share this Post

Login to comment
No Comments