Nagaland : Court-in CM Liezietsu-a floor test neih hun a stay

Gauhati High Court, Kohima bench chuan Nagaland Chief Minister Shurhozelie Liezietsu-a'n House-ah thlawptu a ngah tawk em tih fiah nana 

floor test buatsaih tura tih chu July 17 thleng atan a stay sak. 

Governor P.B. Acharya chuan CM Liezietsu hi July 15-ah floor test hmachhawn turin a lo hriattir tawh a, mahse kar kalta Zirtawpni khan  

Court chuan stay sak a nih thu a tarlang a ni. Liezietsu hian Justice L.S.Lima hnenah petition a thehlut a, Governor-in floor test nei tura hun a 

ruatsak chu hma lutuk leh, ram danpui kalh niin a sawi.  Liezietsu chuan July 29-a Northern Angami-I constituency by-election atan a 

inbuatsaih mek tih sawiin, hetih laia floor test lo buatsaih chu thil dik lo a ni, a ti. Hemi chungchang hi ngaihtuah a nih hnuah court chuan stay 

order hi a tichhuak ta a ni. Court chuan Governor thupek chu stay a ni a, July 17 hma chuan florr test buatsaih theih  a ni lo tih a tarlang. 

Nagaland politics buaina hi CM Liezietsu-a'n financial adviser atan a fapa a ruat aṭanga inṭan a ni. Liezietsu hian a fapa chu minister-te 

pawmpuina la loin cabinet status a pe a, an hlawh ang a hlawh ve bawk. He thutlukna avang hian cabinet minister leh MLA eng emaw zat chu 

CM lakah hian an hel a, hel zinga minister pali chu an nihna hlihsak an ni. Rorel lai Democratic Alliance of Nagaland (DAN) sorkar-a party 

mala seat nghah ber Naga People’s Front (NPF) legislator tam zawk chuan CM an thlawpna an hlip a, CM paithlak tumin hma an la ta a ni.

Chief Minister ni lai Shurhozelie Liezietsu-a lakah hian minister pali leh Parliamentary Secretary mi 10-te chu an hel a, CM hi a nihna aṭanga 

bang turin an phut a ni. Liezietsu hian Home Minister Yanthungo Patton, Power Minister Kipili Sangtam, National Highway and Political 

Affairs Minister G. Kaito Aye leh Forest and Environment and Climate Change Minister Imkong L. Imchen-te chu a cabinet aṭangin a paih a, 

anni bakah hian NPF legislator pali leh Independent MLA parukte chu Parliamentary Secretary an nihna a hlihsak bawk. 

Hetiang a nih mek lai hian kum tir lama chief minister aṭanga bang ta T.R Zeliang a lo lang a, Governor hnenah sorkar thar din turin thlawptu a 

ngah tawk tih a sawi. Zeliang hian NPF legislator leh Independent MLA thlawpna a hmu ṭha tih sawiin seat 60 awmna assembly-ah thlawptu mi 

41  a nei tih a sawi. Zeliang hian thlawptu a ngah tawk tih leh, sorkar thar din tura floor test hmachhawn a ngam thu a sawi. T.R Zeliang hian 

Prime Minister Narendra Modi leh Union Home Minister Rajnath Singh-te hmu turin New Delhi a lo pan tawh bawk. 

NPPC-te'n president’s rule puan an duh

Nagaland Pradesh Congress Committee (NPCC) chuan politics a buaina an tawh mek chu chinfel thuai an duh tih sawiin, president’s rule puan 

chu a chinfelna ṭha bera an ngaih thu an sawi. NPCC chuan NPF kaihhruai DAN sorkara thuneihna inchuhna chuan buaina nasa zawk a chawk 

chhuak thei tih an sawi a, state sorkar inrelbawlna chu dik leh fel fai taka kalpui an duh thu an sawi. CM hlui Neiphiu Rio, TR Zeliang leh tuna 

chief minister ni lai Dr Shurhozelie-te kaihhruaina hnuaiah sum leh paiah harsatna an tawh nasat thu an sawi a, leiba a pung chak hle niin an 

sawi bawk. 

Hetih lai hian Chief Minister hlui leh tuna MP ni bawk Neiphiu Rio pawhin politics a n buaina chu chinfel thuai a duh tih a sawi a, NPF 

sorkar-ah mipuiten rinna an nghat ngam tawh lo niin a sawi. 



Share this Post

Login to comment
No Comments