Nimin kha September 14 khan Hindi Diwas a ni a, Dawrpui Multipurpose Hall-ah hman niin, chief minister Lalduhoma leh Education minister Dr Vanlalthlana ten an hmanpui. CM chuan, Hindi thiam a ṭul tawh thu sawiin, "Kan culture nen Hindi i thiam ang u; vai thuama inthuam kher a ngai lo," a ti.
Chief Minister chuan, Hindi chu India rama ṭawng tuallêng ber a nih avangin thiam a pawimawh a, Mizote pawhin an thiam ngei a ṭul thu sawiin, "Tourist kan ngah chhoh zel avangin lirthei khalhtute'n an thiam a ngai a, kan tourist guide te, police leh politician ten kan thiam a ngai. Hindi ṭawng thiam hi a tâwk. Kan culture nen Hindi hi i thiam ang u," a ti a; Hindi thiam vanga an thuam inbel leh an làm dana làm kher ṭul a tih loh thu a sawi.
Mizo culture humhim tura kalkhawmte chahin CM chuan, "Masihi Sangati-te pawh biak-inah an zai ṭhin a, vai incheiin an rawn inchei kher ṭhin a, hei hi ka hrethiam lo. An ṭawng thiam kha a ṭul kan ti a, tuna kan hun hmanah pawh kan item tam ber hi hnam dang culture kan show a, Mizo culture a leng tawh lo. Hetiang a nih chuan Hindi kan thiam rual hian assimilation-ah kan lut ang a, kan sakhuana thleng hian a la hliau phak mai ang tih ka hlau a ni. Mizo incheia incheiin Hindi-in a zai theih a, a ṭawng theih," a ti.
Lalduhoma chuan, Independence movement a chhuah laiin vai ṭawnga ṭawng hrim hrim huatna a awm thu sawiin, "Vai huat kan inzirtirnaah khan an ṭawng nen lam kan inhuattir a, chumi nghawng chu a thui em em a, chu chuan Mizote Hindi min thiam lohtir nasa a, a pawizia tunah hian kan hria," a ti. India rama mi tam zawkin Hindi an hman avang leh sorkar laipuiin Hindi a uar chhoh zel avangin Hindi-a ṭawng thiam bakah, Hindi ziak leh chhiar thiam a ṭul thu a sawi bawk.
Education minister Dr Vanlalthlana pawhin thu sawiin, Education Reforms Committee-in Hindi Speaking Day hman a rel thu sawiin, "Thla khatah ni khat talin bul ṭan kan rêl a, Hindi thiam hi hnam dangte nena kan inpawhna leh kan eizawnna atana thil ṭul a ni," a ti a; Mizoramah Hindi-a PhD nei mi 20 vel an awm tawh thu a sawi.
Hindi Diwas hi Mizoram Hindi Prachar Sabha (MHPS) bultuma hman a ni a; MHPS vice chairman Lalchungnunga'n kaihruaiin, chairman RB Lalmalsawma pawhin thu a sawi. Kendriya Vidiyalaya, Ṭhuampui, RB Mahavidyalaya, Mount Carmel School leh Divine Intervention School zirlaite an tel.
Inkhawmah hian Spoken Hindi Course zir zo traffic police-te hnenah Chief Minister-in certificate a hlan a; Education Minister-in Hindi-a PhD nei tharte hnenah certificate a hlan bawk.
