Serkawn sports stadium lungphùm phúm Ram hausa ni turin ruahmanna siam a ni - CM

Chief minister Lal Thanhawla chuan nimin khan Lunglei Serkawna sports stadium sak tur lungphûm a phúm. CM chuan, "Ram hausa ni turin kan hotute'n ruahmanna an siam a ni," a ti.

CM Lal Thanhawla chuan, Mizoram chu intodelh chauh ni lo a, ram hausa ni turin ṭan an lak mek thu a sawi a; chutih rual chuan, Mizo mipui tam takte'n kuttling loa sum lak an duh avang leh zangnadawmna an phût ṭhin avangin Mizoramah project liante kalpui a harsat thu a sawi a ni.

Lal Thanhawla chuan, "Kan ramah natural gas hausakna tham a awm tih hriat a ni tawh a, duhamna avangin harsatna kan tâwk leh ṭhin; ram palailénga LSC nei lo nei kan awm tlatte hi a pawi a ni," a ti a; rilru siamṭhatna (moral reformation) lama ṭan lak a ngaih thu leh khawtlang nun tlahniam ta chu siamṭhat a ṭul thu a sawi.

Serkawna sports stadium sak tur project hi UD&PA leh NBCC ṭangkawpin an siam niin, September 4, 2013-a sorkar laipui aṭangin sanction hmuh a ni a, cheng nuai 2418.08 senna tur a ni. Sports stadium-ah hian football khelmual puitling, public gallery leh ṭhutna (chair) 1,000 leh thil dang eng emaw zat awmna tur a ni.

Sports stadium sakna tur lung phûmnaah hian UD&PA minister Zodintluanga, minister PC Lalthanliana, parliamentary secretary S Laldingliana leh Lunglei HPC vice chairman, Joseph Lalhimpuia te pawh an tel a ni.


Share this Post

Login to comment
No Comments