MZU leh PUC hnenah ISO certifcate hlan

Nimin khan Mizoram University (MZU) auditorium-ah MZU leh Pachhunga University College (PUC) hnenah International Organization for Standardization (ISO) certificate hlanna inkhawm hman a ni a, Higher & Technical Education minister R Romawia'n a hmanpui.

HTE Minister chuan, MZU leh PUC-te'n ISO certification an nei thei chu lawmawm a tih thu sawiin, "Thil chhin­chhiahtlak tak a ni. Zirna-in pahniha zirtirtu leh thawktute thawhrimna leh inpekna vangin he dinhmun hi an thleng thei a ni," a ti a; MZU leh PUC chu India hmar­chhaka zirna-in zingah ISO certification nei hmasa pawl an nih thu a sawi.

ISO certification chu zirna-inte'n hma an sawn zel theihna tura ban pawimawh tak pakhat a nih thu sawiin R Romawia chuan, "He hmasawnna hian kawng tam takah zirlaite pawh a pui ngei dawn a ni. ISO certificate field dang hrang hranga in hmuh zel theih nan ṭhahnemngai takin ṭan la zel ang che u," a ti.

July 8-10, 2018 chhung khan HYM International Certifications Pvt.Ltd., Hyderabad aṭangin certified ISO auditor Sivaiah Alapati chuan MZU leh PUC-te hi a enfiah a ni.

MZU hian ISO certification pali dilin, ISO Certification 9001:2015 Quality Management System, ISO 14001:2015 Environment Management, ISO 50001:2011 Energy Management leh ISO 27001 Information Security Management System an nei thar a; PUC chuan ISO certification pahnih dilin, ISO  9001:2015 Quality Management leh ISO 14001:2015 Environmental Management an nei thar thung.



Share this Post

Login to comment
No Comments