World Blood Donor Day hman a ni Thisen pek hi a Mizo a, a Kristian a ni - Thanzara

Nimin, June 14 kha World Blood Donor Day a ni a, Aizawl leh district headquarters hrang hrangah hman a ni. Thupui chu 'Be there for someone else. Give blood, share life' tih a ni a; pawl hminga thisen pe ṭhate hnenah chawimawina hlan a ni. 

World Blood Donor Day hi Aizawlah chuan Mizoram State AIDS Control Society (MSACS) leh Association for Voluntary Blood Donation (AVBD) bultumin Lal Thanhawla Auditorium-ah hman a ni a; khuallian, Health Minister chuan, Thisen pek hi a Mizo a, a Kristian em em a ni," a ti.

Lal Thanzara chuan, thisen chu damdawi hlu tak, a tlukpui siam chhuah theih loh a ni tih sawiin, "Pathianin kan mihringpuite kan chhan chhuahna tura remchang min pek a ni ang, tih hial tur a ni. Thisen hi roha khêk tlat chi a ni lo a, damlo mamawh ngawih ngawih tan lunghlu  leh rangkachak hlu ber ai pawha hlu a ni," tiin, pian champha leh hun remchang dangahte mi dang tana thisen pek uar zual zel turin ṭhalaite a sáwm.

Health Minister chuan, a bikin Aizawl Civil Hospital blood bank-ah doctor an indaih tâwk thei lo tih sawiin, "Thisen pe tur an tam a, thawktu indaih lohna vangin pawl hminga thisen pe duhte'n an duh hunah an pek theih loh cháng a awm ṭhin," a ti a; thawktu indaih lohna vanga pawlte'n an duh huna thisen an pek theih loh chungchangah sorkar hmingin mipui hriatthiamna leh ngaihdam a dil a ni.

Khualzahawm, Mizoram Youth Commi­ssion chairman Joseph Lalhimpuia, MLA pawhin thu sawiin, "Mizo kan nih vang ringawt pawhin thisen kan pe tur a ni a, Kristian kan nih avang pawhin kan pe tur a ni. Mizo ṭhalai kan ni a, ringtu kan ni a, mi dangte chhan nana thisen pek hi ka tih tur a ni tih i hre thar zel ang u," a ti.

Joseph Lalhimpuia chuan, pawl hminga thisen pe ringawt tan thisen pek theih zat ang pek a ni thei dawn lo tih sawiin, "Thisen pek hi mimal ang pawha kan mawhphurhna a ni a, YMA leh kohhran ṭhalai pawl anga kan pek rual hian, mimal ang hian, ka hman hunah, ka remchan hunah i pe ṭhin ang u," a ti a; thisen pe ṭhinte chu mi dangte fuih phurtu nih tum turin a chah nghal.

Aizawla World Blood Donor Day hmannaah hian MSACS project director Dr Lalmalsawmi Sailo pawhin thu a sawi a, thisen dawngtute aṭangin testimony ngaihthlak a ni a; AVBD general secretary Lalrinkima kaihhruaiin kum 2017-18 (financial year) chhunga pawl hminga thisen pe tamte hnenah chawimawina hlan a ni.

AVBD General Secretary report-a a lan danin, Mizoram puma blood bank 10-ah thisen unit 26,248 pek a ni a, chung zinga unit 21,880 (83.36%) chu voluntary donation a ni. Kohhrann ṭhalai pawlte'n unit 6,279, zirna-inte'n unit 4,109, YMA-te'n unit 1,543 leh pawl dangte'n unit 3,654 an pe a; mimala pek (individual voluntary donation) zat chu unit 6,279 (23.92%) a tling bawk. 

Pawl hminga thisen pe tamte

#PawlCampPek zat

Religious Category

1.ṬKP Coordination, Aizawl4Unit 533

2.Territorial SAY4Unit 288

3.IKK Ṭhalai Pawl1Unit 112

YMA Category

1.Keifang Joint YMA1Unit 164

2.Bethlehem Vengthlang Br.2Unit 144

3.Chaltlang Branch1Unit 126

Institution Category

1.Pachhunga University 

College NSS2Unit 673

2.Govt. Aizawl College NSS2Unit 366

3.Hrangbana College NSS2Unit 326

Miscellaneous Category

1.Sports & Youth Services 

Department4Unit 444

2.Inter-College Youth 

Adventure1135

3.Congress Party Ṭhalai1Unit 125



Share this Post

Login to comment
No Comments