Vety College din champha lawm

College of Veterinary Science & Animal Husbandry (CVScAH), Selesih chuan chuan nimin khan an auditorium-ah an din champha an lawmna leh zirlai kal chhuak tawhte intawhkhawm an buatsaih a, chief minister Lal Thanhawla'n a hmanpui.

Chief Minister chuan, CVScAH, Selesih din a nih theih nan Mizoram sorkar leh Central Agriculture University chu lungrual taka pên tlang ṭhin an nih thu a sawi a, "A thawktute inpekna rah leh zirlai chhuak tawhte hlawhtlinna avangin CVScAH chu India rama Agriculture University ṭha berte zingah chhiar tel a ni tawh a, a lawmawm tak zet a ni," a ti.

Central Agriculture University hnuaia din mek Horticulture College, Thenzawl pawh tihpuitlin thuai a nih theih nan hmalak chhunzawm zel a nih thu leh harsatna ching fel turin a hmunah vawi tam tak a tlawh tawh thu Chief Minister chuan a sawi.

Chief Minister chuan, Mizoram innghahna, kut hnathawktute thawh chhuah tipung turin NLUP kalpui a nih thu leh NLUP tiphuisui a, NLUP-a hma la mekte ṭanpui chhunzawm nan NEPD kalpui a nih thu a sawi a, "Veterinary Science & Animal Husbandry zir chhuak tawh, mithiam rualte'n NEDP hnuaiah Entrepreneur Development Scheme huanga rawn zuan luh tum se a ṭangkai hle ang," a ti.

CVScAH Foundation Day lawmna inkhawmah hian CAU, Imphal vice chancellor Prof. Premjit Singh leh CVScAH dean Dr Kartikesan te pawhin thu an sawi.

CVScAH-ah hian department 17 a awm a, zirlai 357 an awm mek a ni.



Share this Post

Login to comment
No Comments