CM-in Helen Lowry College a hawng

Helen Lowry College of Arts & Commerce, Seventhday Tlanga mi chu nimin khan chief minister Lal Than­hawla'n a hawng. He college hi Mizo­ram University hnuaiah an inziak lut a ni. 

CM Lal Thanhawla chuan, arts leh commerce zirna college din a ni chu lawm­awm a tih thu a sawiin, a tam thei ang bera mithiam chherchhuak turin duhsakna a hlân a, "Mizoramin science leh commerce graduate chhawr tlak tam tak kan hma lawka Mizoram hmabak thlirin a mamawh a ni," a ti a; college dintu leh enkawltute chu faina, hriselna leh zûk leh hmuam insûm kawngah mite hriat hlawh an nih angin, an zirlaite pawh college dangte entawn tlaka zirtir tura a beisei thu a sawi.

Sap ṭawng huphurha vai ṭawng hmu­sit leh si, eng ṭawng emaw tal pawh thiam nâl tak tak lo Mizo zingah an tam thu sawiin Lal Thanhawla chuan, "Kan chhehvela mite ṭawng kan hriat­thiam hi engkimah a pawimawh tih kan hriat a ngai. Hnam dangte páwng nêk ngawt hi thil sâwt ber a nih loh avangin zirna, thiamna leh thluakin an tih theih leh an aia thiam tuma ṭan lak hi Mizorama Mizote tana ṭan lakna tur hmanhmawhthlak a ni," a ti.

Inkhawmah hian Seventhday Adventist (SDA) Mizoram Conference president, pastor R Biakthangsanga'n Helen Lowry College din a nih dan leh kal zel an tum dante a sawi.

College-ah hian admission hawn mek a ni a, Arts leh Commerce subject-ah zirna kalpui tur niin, admission ti tawh zirlai 50 an awm a ni. 



Share this Post

Login to comment
No Comments