Zirna lama hmasawn dan tur sawiho

January 20, 2017 khan Aijal Club-ah 'Round Table Meeting on Promoting Technology in Education in Mizoram’ buatsaih a ni a, School Education minister H Rohluna'n a hmanpui.

School Education Minister chuan, Mizoram sorkar chu mipui hmasawn leh nun kawng siam ṭhatna atana hmachhawp hrang hrang scheme leh project-te tihlawhtling turin zau takin a inhawng reng tih a sawi a, "Tata Trust-te'n an rin tâwk vang leh Finance department leh Law & Judicial department-te'n uluk taka an zir chian hnuah rintlak ngei nia an hmuh avangin CLIx project kalpui tur­in TISS nen thawhhona thuthlung ziah a ni," a ti.

CLIx project kalpui tura an hmalaknaah School Education directorate-a thawkte fakin H Rohluna chuan, "Zirlaite leh zirtirtute'n he project hi an hlâwkpui a, a lawm­awm hle. CLIx project hian Mizorama zirlai tam zawk, hmun kilkhawr tak taka awmte thlengin a huam vek a, hmasawnna a thlen zel ka beisei," a ti a; CLIx project chu a hlawhtlin ngei theih nan kawng hrang hrang hranga puih a inhuam thu a sawi.

Meeting hi School Education secretary P Lalchhuanga'n a kaihruai a, Mizoram University-a vice chancellor mawhphurhna la mektu Prof. Lianzela pawhin thu a sawi. Mizoram sorkara officer leh TATA Trust, CLIx official leh Tata Institute of Social Sciences (TISS) official-te an tel a ni.



Share this Post

Login to comment
No Comments