MNF-in Laldenga thih champha hmang

July 7, Pathianni khan MNF dintu leh president hmasa ber, Laldenga thih champha a ni a; Laldenga thih champha vawi 23-na pual hian nimin zing khan MNF-te'n hun an hmang a, a thlanah pangpar an dah.

Laldenga hriatrengna inkhawmah hian a nupui, Lalbiakdiki chuan, a pasal thih champha vawi 23-na a tling tawh chunga kum tin MNF party-in amah hriatrengna hun an hmang ṭhin chu inchawimawina tàwp nia a ngaih thu a sawi a; Aizawl khawpui laili taka a pasal thlan a awm chungchangah, 'state funeral' hmasa ber a nih avangin sorkar duhsakna a dawng tih sawiin, "Amah a ropui vang leh a lar vang a ni lo a, Mizoram leh hnam tana theihtawp a lo chhuah ve vang a ni," a ti.

MNF president, Zoramthanga chuan, Mizo nationalism chu thlahtute aṭanga Pathianin a lo dah tawh thu leh chumi chawk nungtu atan Pathianin Laldenga a ruat tih a sawi a, "Mizo thinlung chu kawng chi hrang hrang hmanga ṭhendarha tihchingpen a ni a, tihral tumin theihtawpin an bei a, sipai chakna hmang te, jet fighter hmangtein bomb leh khaw hâl leh pawngsual, nunau thlabara siamna te, sawisen loh tawrhna zozai kan chungah an thlentir chung pawhin, Mizote thinlunga Pu Denga’n hnam rilru a tuh chu sut chhiat zawh rual a ni lo," a ti.

Zoramthanga chuan, khawvel leh India ramah nationalism leh regionalism a ṭhang lian tial tial tih sawiin, "Mahni ram leh hnam din khawchhuahna turin theihtawp an chhuah ta vek a, Mizote nationalism-a chiang tura sûlsutu kan ni," a ti.

Laldenga thih champhaa hun an hman hi MNF sr. vice president, Tawnluia'n a kaihhruai a, MNF hruaitu hrang hrangte'n a thlanah pangpar an dah a ni.


Share this Post

Login to comment
No Comments