YMA-in national award dawng dawn

Ruihhlo dona kawnga a hnathawh avangin sorkar laipuia Ministry of Social Justice & Empowerment chuan 'National Award for Outstanding Service in the firld of Prevention of Alchoholism and Substance (Drug) Abuse' dawng turin YMA a thlang.

YMA-in award a dawnna tur category chu hlawkna nei loa ruihhlo dotu (non-profit institution)-ah a ni a; award hian Rs. 4,00,000, thuchei leh memento a keng tel. Award hi June 26, 2013-ah India president, Pranab Mukherjee hnen aṭangin an dawng ang. Award dawng tura thlan a nih thu hriattirna lehkha chu June 10, 2013 khan ministry-a joint secretary, TR Meena-in a thawn a ni.

Central YMA chuan, YMA-in award a dawn theih chhan chu ruihhlo dona kawnga Mizo mipuite ṭanrualna leh thawhhona vang a nih thu leh, Pathian awmpuina vang a nih thu a tarlang a; award dawng thei tura Aizawl DC-in a ṭul angte a buaipui avangin lawmawm an tih thu an sawi.


Share this Post

Login to comment
No Comments