ZoAqua tui pe kîr vek turin hriattir

Health Services joint director (Food & Drugs Administration) Lalsawma chuan, tun hnaiah packaged drinking water (ZoAqua) ṭha lo hmuh chhuah a nih thu nimin khan a tarlang a; zawrh tura dawra la kawlte chu an lâkna kaltlanga pe kîr vek turin a hriattir.

Lalsawma chuan, ZoAqua ṭha lo tun hnaia hmuh chhuahah mit lâwnga hmuh theihin nâwi tam tak a awm thu a tarlang a, "Hei hi social media-ah thehdarh a ni a, a siamtute pawhin social media-ah vêk thuphá an chawina hmuh zui a ni bawk," a ti.

ZoAqua tui chungchang chu FDA-in an chhui zui nghal tih sawiin Lalsawma chuan, "ZoAqua packaged drinking water siamtu MZ Agencies, Sihhmui hi an FSSAI licence a thih hnuah renew a ni lo a, FSSAI licence renew turin Bureau of Indian Standard certificate an renew a ngai a, chu pawh chu an renew lo bawk," a ti a; Food Safety & Standard Act, 2006 and Rules/Regulations angin packaged drinking water an siam chhuah phal a nih loh thu a tarlang.

MZ Agencies, Sih-hmuiin social media-a April 2021-a mineral water an siama thil thleng palh anga an sawi chu an licence a thih hnu daih a nih avangin dan bawhchhiain an siam tihna a nih thu te, an licence tihnun a nih hma chuan an siam phal a nih tawh loh thu leh, December 2020 hnu lama an siam sa bazara la awm zawng zawngte chu MZ Agencies-in an lak lêt vek a ngaih thute a tarlang bawk.