CM hlui leh Mizo Award 2011 dawngtu Brig. Ṭhenphunga Sailo kan chân ta

Mizoram chief minister pahnihna, Brig. T Sailo chu nimin chawhma dar 11:50 khan New Life Hospital, Aizawlah a thi a, vawiin chhun dar 12-ah Kanan Veng, Aizawla an inah vui a ni ang. Brig. T Sailo hi Mizo Award hmasa ber kum 2011-a pek chhuah dawngtu a ni.

Brig. T Sailo enkawltu nurse-in Vanglaini palai a hrilh danin, Ṭhenphunga hian natna bik a nei lo a, blood sugar nei mah se, nimina a thih dawn thlengin a blood sugar chu a pangngai (normal) a ni. Tun hnaiah harsatna sawi tham a nei lo a, niminah pawh ṭha takin tukṭhuan a ei. Chaw eikham zing dar 10 pelhah khumah mu hahchawlin dar 10:30 velah a thâwk a buai thut a, dar 11-ah New Life Hospital an pan nghal a, dar 11:50-ah a thi ta a ni.

Ṭhenphunga Sailo hi vawiin chhun dar 12-ah an inah vui a ni dawn a; amah sûn nan Mizoram sorkar chuan nimin kha half holiday-ah a puang a, hnam puanzar a ngul chanve-a zâr turin thupek a chhuahi. Sorkarin half holiday a puan leh hnam puanzar a ngul chanvea zâr tura tih hi Ningania boral ta Mizoram Governor hlui, PR Kyndiah sûnna atana tih a ni tel bawk.

Brig. T Sailo hi January 1, 1922-ah Ṭhuampui, Lunglei district-ah a piang a, a pa chu sailo lal Vanchheuva niin, a nu chu Hrangvungi a ni. Lehkha thiam thei tak niin Serkawn ME School-ah a kal a, Serkawn ME School aṭanga ekzamin Mizoram pumpuiah pakhatna a ni.

Kum 1937-1940 chhung Shillong-ah high school a kal a, Serampore College-ah Intermediate of Science a zir laiin Indopui Pahnihna avangin kum 1942-ah a zirna bansanin British Army a zawm a, Second Lieutenant niin, Mizo zinga sipai officer hmasa ber a ni. Kum 1946-ah PS Dahrawka fanu Thansiami nen an innei a, fapa pathum leh fanu pakhat an nei.

Kum 1960-ah Lieutenant Colonel-ah a kaisang a, kum 1963-ah Colonel-ah a kaisang leh a, kum 1966-ah Brigadier niin Mizo zinga sipai Brigadier tling hmasa ber a ni. Sipai chawimawina sang AVSM a dawng bawk. Sipaia kum 32 a ṭan hnuah kum 1974-ah a châwl. Sipai huaisen, thuawih, hun vawng dik leh entawntlâk tak a ni a, sipai rinawm tak a ni a, hotute dughsak hlawh khwpin hna a thawk ṭhin.

Ṭhenphunga Sailo hi sipai aṭanga a chawlh hnuah Mizorama rambuai vanga Mizo mipuite thlamuan tura kohna chhángin Mizoramah a lo haw a; rambuai vanga Mizo mipuite harsatna sutkian tumin kum 1974-ah Human Rights Committee a din a, chu pawl chu March 17, 1975-ah political party-ah letin, People's Conference an inti a, tun hnuah Mizoram People's Conference tih a ni.

Kum 1978 MLA inthlanah PC party chuan sorkarna changin, Brig. T Sailo chu chief minister a ni a, June 2, 1978-ah chief minister a ni ṭan a, November, 1978-a President's Rule-a Mizoram puan a nih thlengin chief minister hna a chelh. Kum 1979 inthlanah PC party chuan sorkarna an chang leh a, Brig. T Sailo pawh a ṭum hnihna atan chief minister niin, kum 1984 thleng Mizoram chief minister a ni.

Kum 1984 inthlanah pawh MLA-ah thlan tlin leh a ni a, a party erawh chu an sorkar zo ta lo. Kum 1988 leh 2008-ah MLA-ah thlan tlin a ni leh a, kum 2013-a a term a tawp hnuah politics a chawlhsan ta a ni.

Brig. T Sailo hi Assembly session-a a tel hnuhnun ber chu July 24, 2013 kha a ni a; hemi ṭum hian thuchah hnuhnung sawiin, politics aṭanga a chawlh tawh tur thu a puang. Assembly House-a a hun hnuhnungah hian T Sailo chuan, "He hmunah hian vawi tam tak kan ṭhuho a, rawng kan báwlho a, a rei ta hle mai. Tunah chuan kum 91 ka ni tawh a, inthlanna ka chuh ve dawn tawh lo," tiin, MLA-a thlang ṭhintu mipuite chungah lawmthu a sawi.

Brig. T Sailo chuan, MLA-te leh politician-te chu Zoram hmasawnna âtchilh tlat tur te, Assembly House chu ram hmasawnna dâltu ber hlemhlêtna dona hmunpui bera nei tur te, dikna, rinawmna, tlawmngaihna leh taimaknate vawng nung tlat turtein a chah a ni.

Brig. T Sailo hian November 29, 2014 khan Mizo Award 2014-ah trophy a hlan a, thuchah tawi a sawi a; hei hi vantlang hmaa a inlan hnuhnung ber nia hriat a ni.

Ṭhenphunga Sailo hian vantlang tana a thawh ṭhat avangin kum 1999-ah Padma Shri a dawng a; Vanglaini-in Mizo zinga kawng hrang hranga chhuanawm bikte tana chawimawina a siam Mizo Award hmasa ber dawngtu a ni. 

BRIG. T SAILO

Pian kum - January 1, 1922

Nupui- Thansiami

Sipaia luh kum- 1942

Pension kum- 1974

PC party din kum- March 17, 1975

Mizoram CM- 1978, 1979-1984

MLA-a tlin kum- 1978, 1979, 1984, 1988, 2008

Politics chawlhsan kum- 2013

Padma Shri- 1999

Mizo Award- 2011



Share this Post

Login to comment
No Comments