J Thankima College building lungphum phum a ni Duhamna avangin Aizawl khawpui a chep - Hawla

Chief minister Lal Thanhawla chuan nimin khan Bawngkawn brigade ramah J Thankima College building sakna tur lungphum a phum. Lal Thanhawla chuan Aizawl khawpui chu duhamna avanga chep a nih thu a sawi.

Chief Minister chuan Aizawla kawngpuite chu tlangram hmun dang aia a tet bik loh thu sawiin, "Aizawl kan chep tak em em nachhan chu ringtu ni sia vantlang tan hnawksak hreh miah lo kan tam vang a ni. Kan duham vangin mahni ram chhungah kan motor leh lirthei dangte dah phal loin, vantlang kawngah ngat kan dah a, garage sa phal loin man chawia midang luah tir kan thlang zawk a, kan chep phah hle a ni," a ti. 

Sorkarin a phak tawk ang zelin hmasawnna kawng hrang hrangah - kawngpui siamah te, power siam chhuah lamah te, rel kawng siamah te, ramdang nena insumdawn tawnnaah te, tui thianghlim in turah te, zirna ṭha leh sang zawk siam kawngahte leh hriselna lamah theihtawp a chhuah mek tih sawiin Lal Thanhawla chuan kuttling loa sum lak duh pawisa miah lote avangin kal chak erawh a har thu a tarlang.

Lal Thanhawla chuan zirlaite chu an ṭhatlai hun hmang tha tura fuihin, "Zir chhuak ve si chhawr tlak si loh, kuthnathawh hmusit tawh si nih a pawizia ngaihtuah let fo a ṭul," a ti a, zirlaite chu mahni nun ṭheuh uluk a, an pawnlam leh chhung lam nun inthunun a pawimawh fo tih hre reng turin a chah.

Chief Minister hian rukruin an computer an ruk sak phuhruk nan J Thankima College hi laptop, desktop computer leh printer a pe a ni.

J Thankima College principal Ramhmangaiha Ralte sawi danin, an college hi kum 1992 khan private college-a din a ni a, kum 1995 khan J Thankima hian sponsored-in college hming atan pawh J Thankima College tihzui a ni. Kum 2002 ah deficit-ah hlan kai a ni a,  kum 2007 Lalhmingthanga College nen inchhunfinin sorkar college-ah hlankai leh a ni.


Share this Post

Login to comment
No Comments