Zira'n Lal Thanhawla Auditorium a hawng Hawla'n rilru tihnat a neih chuan ngaihdam a dil

MPCC vice president R Lalzirliana chuan nimina khan Congress Bhavan building-a Lal Thanhawla Auditorium a hawng.  Auditorium hawn zawha an party office kumin atan an hawnnaah Chief minister Lal Thanhawla chuan, kum 2014 chhunga ṭawngkam mawi lo a lo hmang palh a, mipuite rilru tihnat a lo nei a nih chuan an ngaihdamna a dil.

MPCC-in nimina an party office, Congress Bhavan kumin atana an hawnaah thu sawiin Lal Thanhawla chuan, "Kan dik lohnate hre reng chuangin, insiamṭha chungin kum tharah chuan kan kal tur a ni. Nun fimkhur takin, sorkar angin mi zawng zawng tana malsawmna nih kan tum zawm zel tur a ni," a ti a; an party mipuite chu mahni theih tawkah ṭheuh mite tana malsawmna nih tum turin a fuih.

Lal Thanhawla chuan, ring lo mite rinchhan loa awm thei lo nih chu zahthlak a tih thu sawiin, "Taimâk kan mamawh, hna kan thawh peih phawt chuan kan ram hi khawizu leh hnute tui luannaa siam theih a ni," a ti a; a kaihhruai sorkar chuan hmasawnna rahbi an tuk mek a, an hmalakna tam tak tihchhiat ni mah se, phunnâwi loin an siamṭha zel tih a sawi.

Sorkar hnathawk zingah kuttling loa sum la lut hreh lo an awm tih sawiin, Lal Thanhawla chuan, "Kuttling loa sum lâk chíngte an tawmim theihna atan sorkar leh kan party-in ṭan kan lak a ngai  a ni," a ti.

Tun hnaia hmun pathuma tualthihna thleng chungchangah Chief Minister chuan, "Heng thil thleng avang hian Mizo nih leh Kristian nih hi a zahthlak rum rum em tih ngaihtuah a awl hle," a ti a; sorkar hotu zinga tel pawh a zahthlak hial tih thu a sawi a ni.

Auditorium hawn paha thu sawiin R. Lalzirliana chuan, Mizoram Pradesh Congress Committee (MPCC) chu Delhi-a Congress party thu thua an awm ngai loh thu sawiin, "Lal Thanhawla'n Mizoramin remna leh muanna a awm theihna atana a lalṭhuthleng a ken kha MNF hoin an pute hlauh vangahte an puh. Khu lam thu khuan kan la awm tak tak ngai lo. Nomination Committee pawh hian a hminga kan hotute an nih avangin list kan theh thla ṭhin a, he lamah kan thlan bak candidate an ni tak tak ngai lo," a ti.

Mizoramin remna leh muanna a neih ni, Remna Ni June ni 30 chu party dang aiin an party chu hmang uar zawk tur an nih thu sawiin R Lalzirliana chuan, "Remna leh muanna a awm theihna atan tumah an inhnûkhniam lo. Lal Thanhawla leh a thawhpuite chauhin an dinhmun an kian a ni," a ti. Mizoramin remna a neih theihna chhan mipui thinlunga a daih lohna atan remna a awm theih chhan uar taka sawi turin an party mite a chah a ni


Share this Post

Login to comment
No Comments