Sangthankima'n award a dawn an lawm

Thutak Nunpuitu Team (TNT) hotupa, Sangthankima'n tun hnaia Mother Teresa Memorial International Award for Social Justice leh Vanglaini buatsaih Mizo Award a dawn chu Inrinni khan TNT hmunah an lawm.
Lawmna inkhawmah Sangthankima chuan, tun dinhmunah TNT Pangpar Huanah mi 300 chuang an awm a, naupang 420 vel, ruihhlo ngai 300 vel, an vaiin mi 1,200 chuang leh thawktu 57 an awm tih a sawi.


Sangthankima chuan, kawng hrang hranga ṭanpui ngaite'n TNT an pan chhan chu - TNT-ah Isua Krista a awm vang a nih thu a sawi a; TNT chu Pathianah an innghat tlat a, kum 27 chhungin chaw chhuan khat pawh an la nghei lo a, an nghei pawh a ring lo tih sawiin, an nghei a nih pawhin Isua vanga nghei an nih tur thu a sawi.
TNT-a naupang 420 enkawl mekte chu a fate nia sawiin, Sangthankima chuan, a fate chu mi puitling tak tak an la ni dawn tih a sawi a; Pathianin ti tura a tih anga thil a tih ṭhin avangin tun hma lam khan hmuhsitna leh diriamna hrang hrang tawk mah se, Pathianah a innghat tlat niin a sawi bawk.


Sangthankima'n award a dawn an lawmnaah hian bialtu MLA leh Assembly deputy speaker R Lalrinawma'n thu sawiin, an rawngbawlna zelna atan Rs. 10,000 a hlan a; Vanglaini joint editor Lalnghinglova Hmar, Central YMA president Lalbiakzuala leh MHIP vice president Dr Thanpuii ten thu an sawi bawk. Award lawm nan tlaiah ruai an ṭheh a ni.


Share this Post

Login to comment
No Comments