Mizo Award 2014 Sangthankima hlan a ni

Vanglaini chanchinbu buatsaih, Mizo Award 2014 chu Thutak Nunpuitu Team (TNT) hotupa, Sangthankima hnenah hlan a ni.

Mizo Award hlanna inkhawm hi November 29 tlai dar 3 khan Aijal Club-ah neih a ni a, Vanglaini joint editor Lalnghinglova Hmar-in inkhawm kaihruaiin, Mizo Award hmasa ber kum 2011-a dawngtu dawngtu, Brig. T. Sailo-in a hlan.

 Vanglaini editor K Sapdanga'n Mizo Award dawngtu hi a puang a; Mizo Award dawngtuSangthankima a kal theih loh avangin a aiawhin a nupui Lalṭhakim'n a dawng a; award hian hûn mawi leh Rs. 1,00,000 a keng a ni.

Vanglaini editor K Sapdanga chuan Mizo Award an buatsaih chhan sawiin, Vang­laini chanchinbuin Mizo mipuite tana ṭangkai nih a duh a, mi hrang hrang an râwn hnu-ah Mizo Award hi an buatsaih ta tih a sawi a. Mizo mipui­te'n ngaihsan rawn tur an mamawh a, lal lal laiin mi tlawmngaite nopui an dawm ṭhin angin Mizo mipuite'n ngaihsan rawn tur mi nei zel se ṭha a tih thu a sawi.

Mizo Award 2014 dawng thei tur mi panga chu Nomination Committee-in an thlang chhuak a, chungte chu - vaihlo dona kawnga nasa taka thawktu Lal Riliani; lung lam enkawltu doctor thiam leh tlawmngai Dr Loncy V Lalzarliana, chhiatna thlen changa chhan­chhuah hna tlawmngai taka thawk 

ṭhin Sairang khawtlang, ruihhlo ngaite leh riangvaite enkawltu Sang­thankima, leh Mizoram sorkara minister chak leh fak hlawh Zodintluang­a te an ni.

Member 25 awmna Selection Committee-in an chanchin chipchiar taka zira an sawiho hnuah award dawng tura an duh ber ṭheuh an thlang a, a hmu sang berin award hi a dawng ta a ni.

Vanglaini editor K Sapdanga chuan, Mizo Award dawng thei tura thlan mi panga­te chuan chawimawina dawn an phu vek tih a sawi a; Award dawngtu Sangthankima a lawmpui thu sawiin, "Ram leh hnam tana 

ṭhahnemngai taka an thawh chhunzawm zel ka beisei," a ti.

Mizo Award hlanna inkhawm neih hmain Vanglaini chuan Aijal Club-ah vek Zoram Titi a buatsaih a, thupui chu 'Mizote thil ngaih hlut' tih a ni.

Zoram Titi hi Zonet Cable TV managing director RK Lianzuala'n a kaihruai a; Zoram Titi hi kum 2011 aṭangin kumtin buatsaih a ni.

Sangthankima

Pian kum - October 18, 1960

Pianna - Tlangsam, Champhai district

Zirna - Pawl 5

Kum 20 a nihin a piangthar a, rualbanlo leh baihvaite enkawlna lamah hun a hmang ṭan nghal.

November 14, 1988-ah Champhaiah Thutak Nunpuitu Team a din.

Zuangtuiah TNT hmunpui an siam. Lunglei, Champhai leh Kolasib-ahte TNT rawngbawlna hmun a awm bawk.

TNT-ah hian Mizote bakah, Chakma, Tuikuk, Assamese, Burma lam mi an awm.

TNT, Aizawlah naupang 424, Pangpar Huanah mi 254, ruihhlo ngai mi 324 an awm mek; an vaiin mi 1,002 an ni. Thawktu mi 68 an awm bawk.

TNT Kolasib-ah mi 40, Lungleiah mi 95 leh Champhaiah mi 63 an enkawl mek.

Sangthankima hian a hnathawh avangin Mizoram leh ram pawn aṭangin chawimawina 20 a dawng tawh.


Share this Post

Login to comment
No Comments