Lunglei College golden jubilee lawm

Lunglei College chuan nimin khan Saikuti Hall-ah an kum 50 tlin, golden jubilee an lawm a, Higher & Technical Education (H&TE) minister R Romawia'n a hmanpui.

Jubilee lawmna hi Prof. C Zairemthanga'n a kaihruai a; R Romawia chuan, ram hmasawnna atan a chhunga cheng mihringte tihhmasawn a ṭul thu sawiin, "Chumi atan chuan zirna hi a pawimawh ber a ni," a ti.

Zirna kalpui dan thlak hret hret a ṭul thu sawiin, R Romawia chuan, "Degree course pangngai rualin eizawnna lam zawnga zirna (vocational studies) chak zawka kalpui a hun tawh a ni," a ti a; zirlaite'n college an kal paha eizawnna atana tlak tur lam beauty culture, food processing, masonry angte pawh zir tel thei se ṭha a tih thu a sawi.

H&TE Minister hian Lunglei College Golden Jubilee Souvenir a tlangzarh a, jubilee lawmpui nan Rs. 40,000 a hlan bawk. Lunglei College-ah hian department 14 a awm a, zirtirtu 61 leh zirlai 807 an awm mek a ni.


Share this Post

Login to comment
No Comments