MZP-in lungawi lohna lantir chhunzawm Duhna college-ah a luh vek theih loh: Romawia

Aizawl khawpui college-a admission chang lo mi 409 an la awm vangin MZP chuan nimin khan Higher & Techinical Education directorate pawnah lungawi lohna an lantir chhunzawm a; nimin vek khan inremna an siam. Hetih lai hian, H&TE minister R Romawia chuan, zirlaite mahni duhna college-ah ngei luh vek theih a nih loh thu leh college-ah quality kenkawh ve a ṭul thu a sawi.

Inremna thu

Lungawi lohna lantir mek a nih lai hian, MZP hruaitute chu H&TE secretary K Lalnghinglova hoin a pisaah H&TE director leh college principal-te nen an inbia a; inremna siamin, admission la hmu lote chu admission tihsak turin ruahmanna siam a ni.

Inremna an siam dan chu - admission la hmu lo, Arts zirlaite chu Aizawl North College leh J Thankima College-ah admission pek an ni ang a; Commerce zirlaite chu Hrangbana College-ah admission an ti ang a, sorkar puihnain college thuneitute'n morning class neih dan tur an ruahman dawn a, Science zirlaite chu a ṭul anga la bawhzui zel tur a ni.

H&TE minister thu

Aizawl khawipui college-a zir duh, admission chang lote'n MZP huaihawta lungawi lohna an lantir chungchang hi nimin khan special mention hun hmangin a sawi chhuak a; zirlaite harsatna sukiang turin H&TE minister a ngen a ni.

Minister R Romawia chuan, HSSLC 2014 result a chhuah tirh aṭangin college admission chungchangah ṭan an lak nghal thu a sawi a; quantity ngaih pawimawh a ṭhat rualin quality neih a ṭul thu sawiin, "Govt. Aizawl College leh Hrangbana College bik chu quality maintain tura tih an ni a, a dang zawng chu an fàn theih tawpa dan turin kan inngen a, an inpawt fán hle tawh a ni," a ti.

R Romawia chuan, Aizawla college-te chu nikum aiin zirlai 858-a tam kuminah zirlai an lak tawh thu sawiin, chuti chung chuan inpawh fàn dan an la zawng zel tih a sawi a; Aizawl pawn lama college-ah seat 544 a la âwl tih sawiin, "Duhnaah ringawt luh theih a ni lo a, a la thawlnaah hian kal mai se, Mizoram chhungah chuan hla lutuk a awm hleinem tiin ngenna siam a ni," a ti.

Aizawl páwna college

H&TE hotute chuan, Aizawl khawpuia college hrang hrangte chuan seat an neih zat aia tam daih leh nikum aia tam daih zirlai an admit tawh thu an sawi. Aizawl páwn lama college hrang hrangah seat 544 a la awm thu an lo tarlang tawh bawk.

Lunglei College principal R Lalrosanga chuan, hotute zirlai pawl ngenna angin Arts-ah zirlai 50-60 vel lak belh a ngaih a rin thu a sawi a, Science-ah erawh chuan practical-ah room indaih lohna a nasat avangin admission a pe thei tawh lo tih a sawi. Lungleia J Buana College principal Dr J Zorema chuan seat 142 an nei chungin zirlai 200 chuang an la tawh tih sawiin, admit belh duh mahse class room an neih tawh ngang loh thu a sawi.

Champhai College principal Lalnunmawia chuan zirlai 20-30 vel lak belh theih inring tih a sawi a; Serchhip College principal Lalhmangaiha Chawngthu chuan Scince-ah zirlai 10 leh BCA-ah zirlai 10 lak belh thei tura an inngaih thu a sawi.

Kolasib College principal R Lalduhawma chuan class room siam belh zelin an kal tawh a, mahse hotute lam aṭang leh zirlai pawl ngenna vangin zirlai 50 vel lak belh theih an inring tih a sawi. Lawngtlai College principal T Thangṭhuama chuan, infrastructure-in a zawh tawk aia tam an la tawh tih a sawi rualin, hotute leh zirlai pawl ngenna vangin an la lak belh theih thu a sawi.

Mamitr College principal APK Singh chuan admission an la hawng reng tih a sawi a; Saitual College principal Dr Lalsiamhnuna chuan admission ti duh an awm chuan hnar an tum loh thu leh, hostel an neih ṭhat thu a sawi. Zawlnuam College principal J Lalsawmliana chuan zirlai an lak belh thei reng tih a sawi a; Hnahthial College principal Vanlalhnema chuan admission ti duh an awm chuan an welcome reng tih a sawi bawk.

Mizoram college-a admission ti zat

(H&TE chhinchhiah dan)

College 2013 2014 Punna/
   
 Kiamna
Pachhunga Univ. College 803 870 67  
Govt. Aizawl College 471 399 -72  
Hrangbana College 583 762 229  
T Romana College 276 396 121  
Johnson College 343 391 52  
Aizawl West College 200 442 242
Aizawl North College 379 446 67  
Zirtiri Science College 245 283 38  
J Thankima College 227 336 109
 Kan biakpawh theih te :-      
Lunglei College 273 254 -19  
J Buana College 204 215 11  
Champhai College  199 187 -12  
Serchhip College 271 372 101  
Kolasib College 354 392 38  
Lawngtlai College 154 206 52  
Mamit College 54 23 -31  
Saitual College  85 110 25  
Zawlnuam College 10 10 0  
Hnahthial College  53 50 -3  
Note: Saiha College, Khawzawl College leh Kamalanagar College dinhmun kan hre thei lo.


Share this Post

Login to comment
No Comments