L Ramkinlova leh Ronald Sapa ten Rajya Sabha chuh turin hming an pe

Mizoram aṭanga Rajya Sabha member tur thlanna, June 19-a neih turah INC aṭangin Ronald Sapa Tlau leh MNF aṭangin L Ramkinlova ten an chuh dawn a; candidate pahnihte hian nimin khan returning officer hnenah nomination paper an thehlut.

MNF candidate, Lal Ramkinlova hian nimin chawhma dar 11 khan returning officer, Hmingthanzuala, Assembly secretary hnenah hming a pe lut a; ani hi eptu party-te intêlkhawmna, United Democratic Front-in an thlawp a ni.

INC candidate Ronald Sapa Tlau pawhin nimin chawhnu dar 2 khan returning officer hnenah hming a pe lut bawk. Candidate turte'n nomination paper an thehluh lai hian chief electoral officer Ashwani Kumar leh joint CEO H Lalengmawia te pawh an awm a ni.

L Ramkinlova chuan zawhna chhangin, Mizoramah eptu party an nih avangin Rajya Sabha inthlanah tling dawn lo chiang saa ngaih ni mah se, hotute thu zawmin nomination a file tih a sawi a, "MLA-te kan nei ve a, anniho vote thlakna tur awm lo ringawt chu ṭha kan ti lo a ni," a ti.

Ronald Sapa Tlau chuan, ram tana thawk turin party-ah a inpe a, party kaltlangin ram tan theihtawp chhuah a tum thu a sawi. MP-ah tling ta se, eptu MP a nih tur chungchanga zawhna chhangin, "Rajya Sabha-ah chuan danglam vak a awm lo a, kan chakna leh chak lohna a ngai reng. Lok Sabha-in Rajya Sabha a nghawng lutuk lo a, a huphurhawm lutuk lo ang," a ti.

Rajya Sabha MP atana nomination file hun hi nimin tlai dar 3 khan a tawp a, vawiin hian nomination paper-te endik a ni dawn a, June 12 thleng inhnuhdawhna hun hawn a ni. Inthlan chu June 19 zing dar 9 aṭanga tlai dar 4 inkarah neih tur a ni a, June 12 ral hmain inthlan kaihhnawih thil pawimawhte tihfel vek tur a ni.

Member 250 awmna Rajya Sabha MP hi state MLA-te'n an thlang ṭhin a, member 250 zinga 238 chu state leh UT-a MLA-te'n an thlang ṭhin a, a bak member 12 chu India President-in a ruat ṭhin. Rajya Sabha MP term hi kum 6 a ni a, kum hnih danah MP hmun thuma ṭhena hmun khat an châwl (retire) ṭhin a ni.

Ronald Sapa Tlau

Ronald Sapa Tlau hi February 2, 1954-ah Hualtu, Serchhip district-ah a piang a, thiamna lamah M.A niin, Howard University, Washington DC aṭangin Communication for Rural Development-ah a nei. A nupui Ramthanpari Tlau leh an fate pathum nen Zonuam, Aizawlah an khawsa a, MPCC-ah chanvo hrang hrang chelh tawhin, tunah hian general secretary a nih bakah, ZENICS-ah chairman a ni mek. Mizoram Assembly inthlanah ṭum thum a ding tawh a, mahse a la tling lo vek a ni.

L Ramkinlova

L Ramkinlova hi March 16, 1962-ah Ratu-ah a piang a, thiamna lamah M.A (Gauhati University) a ni. A nupui, KT Kimi nen pa pali an nei a, Falkland Veng, Aizawlah an khawsa mek. Politics-a a luh hmain sorkar hna leh zirtirtu hna leh hna dang chi hrang hrang a thawk a, kum 1986-ah MNF zawmin, nihna pawimawh hrang hrang a chelh tawh a, tunah hian general secretary hna a chelh mek a ni.


Share this Post

Login to comment
Latest Comments (1)
lalchhanhima.varte - 14th Jun 2014 09:23:35 PM

Pu Sapa chu a awm veng vawng khawp mai. Pu Hawla nge nge thlan awm a hria e.