2012-13 ah sangha metric ton 5249.295 thar

Fisheries department chhinchhiah danin, kum 2012-13 chhung khan Mizoramah sangha metric ton 5249.295 thar chhuah a ni a; kum kal mek, 2013-14 chhungin metric ton 5400 thar chhuah a ni tawh bawk.

Kum 2012-13 chhunga sangha thar chhuahte chu sangha khawitu mi 821-te'n sangha dil hectare 4,465-a zau aṭanga an thar chhuah a ni a; kum 2013-14 chhunga thar chhuah tawh metric ton 5,400-te zinga hian metric ton 5,100 chu dîl (pond) aṭanga thar niin, metric ton 400 chu lui leh tuikhuah aṭanga thar a ni.

Fisheries department hotute chhinchhiah danin, Mizoramah sangha khawi theihna (fish farming) hectare 24,000-a zau a awm a, chung zinga hectare 4,500 chu sangha khawi nan hman mek a ni. Sangha khawi leh a kaihhnawiha ei zawng chhungkua 10,838 an awm a, sangha mantu tak chu chhungkaw 2,000 vel an ni.

NEC chhut danin, mihring pakhatin kum khatah sangha kg. 11 a mamawh a, tuna Mizoram thar chhuah tam dan aṭanga chhût chuan, mi pakhatin kum khatah kg. 4.81 ei ral ang a ni. Kum 2013-14 chhunga sangha chi Mizoramin a mamawh zat chu nuai 360 a ni a, sorkarin sangha chi nuai 15 a thar a, mimal dil neite'n nuai 245 an thar ve thung. State pawn aṭangin sangha chi nuai 100 lak luh a ni bawk.

Sorkar flagship programme, NLUP hnuaiah sangha khawi hlawhtling chhungkaw 1800 an awm a, chhungkaw  1,470 chuan tlangram lo neih an bansan phah tawh niin Fisheries hotute chuan an sawi.

Fisheries department hotute chuan, Serlui 'B' HEP tuikhuah an lilâm/mahal aṭangin kum nga atan cheng nuai 45.1 sorkarah an chhung lût tih an sawi a; Serlui 'B' tuikhuaha sangha man theihna chu kum nga atan an lilâm a, a chháng huai berin kum nga (2013-18) chhung atan nuai 45.1-in an chhang a ni.

Zawhna chhangin, Fisheries department hotute chuan, lui bula khawsa tualchhung mite hmakhaw ngai takin hma an la tih an sawi a; tualchhung mite chuan sangha an man thei a, sangha an mante chu a mahal-tu hnenah an hralh leh ṭhin a ni.


Share this Post

Login to comment
No Comments