Vanglaini chawlh chhunga thil thleng larsarte

December 21, 2013:
@K Lalremruata, Electric Veng, Aizawl chuan Aizawl Civil Hospital-ah thisen a pe a, thisen vawi 53 a pekna niin, Mizorama thisen pe tam ber record a siam. K Lalremruata hian Mizorama thisen pe tam ber record siam rengtu, Lalawmpuia, Dawrpui chu a khum ta a ni. THLALAK

@Serchhip District Anti-Tobacco Squad-in Serchhip bazar leh maxi-cab stand-ah dan phal loha meizial zu an vâi a, mi 83 manin, pawisa an chawitir nghal a, an pawisa chawi tling khawm chu Rs. 2,300 a ni.

@November 23, 2013-a Tuipuibari leh Damparengpui inkara Bru helhoin mi pathum an rûkbo zinga pakhat, Sanglianthanga pu, Vanlalpeka, Durtlang leh Sanglianthanga nupui, Lalduhpuii, Mutthi-a awmte'n Home minister, R Lalzirliana an hmu a; Sanglianthanga chu a rubotute'n Krismas hma ngeia an chhuah theih nan chak taka ṭan la turin an ngen. Home minister chuan sorkarin theihtawp a chhuah tih a lo hrilh a, Sanglianthanga nupui hnenah Krismas mamawh lei nan Rs. 3,000 a pe a ni.

December 23, 2013:
@Zing dar 7:30 velah Kolasib-a Excise & Narcotic enforcement-te'n damdawi kheh chi, pseudoephedrine mûm 31,45,584 an man. Excise & Narcotics-te hian report an dawn bawhzuiin, Delhi aṭanga lo kal truck, HR-63 B-0675 an lo endik a, pseudoephedrine hi an man ta a ni; damdawi hi Rs. 1,88,73,500 man a ni. Pseudoephedrine neitu nia hriat Mizo pali, mipa pakhat leh hmeichhia pathum an man a; truck khalhtu hnam dang an man tel bawk.

@November 23, 2013-a Bru helhoin mi pathum an rukbote zinga mi, Sanglianthanga chhungte, Muthi-a mite hnenah MHIP gen.hqrs-in ṭanpuina Rs. 5,000 an pe. Ṭanpuina hi MHIP president, Lalthlamuani'n Sanglianthanga nupui, Lalduhpuii hnenah a hlan a ni.

@Union Public Service Commission (UPSC) chairman, Prof. DP Agrawal-a'n Mizoram a rawn tlawh a, zanah chief minister, Lal Thanhawla chu a chenna bangla-ah a hmu.

Chief minister chuan, UPSC kaltlang lak, Central Service-ah Mizo am tam ṭhin thu a sawi rualin, tunah chuan Mizoram an tlem tak thu a sawi a; Central Service-a Mizo an luh tam theih nan Mizoram sorkarin  Youth Commission a din a, Youth Commission chuan IAS coaching-te a buatsai thu leh, skill development lamah sorkarin chak taka ṭan a lak thu a lo hrilh a ni.

Prof. DP Agrawal hi Central sorkarin Mizoram sorkara civil service officer ni lo (non-state civil service officer)-te tana an kaisanna tur IAS post pakhat, AGMUT joint cadre Mizoram segment-a siam belh chungchanga candidate thlan dan tur leh, Mizoram Police Officers pahnih, IPS-a hlankai tura Selection Committee meeting nei tura lo kal a ni. THLALAK

@Chief secretary conference room-ah Mizoram sorkara civil service officer ni lo tana IAS post pakhat hnawhkhahna turin interview neih a ni a, candidate pangate Selection Committee hmaah an inlan. Hemi rual hian, MPS officer pahnih chu IPS-a an kaisanna turin interview neihpui an ni bawk. Selection Committee-ah hian UPSC chairman, Prof. DP Agrawal; Mizoram sorkar aiawhin chief secretary, L Tochhawng; Union Home ministry-a Addl. secretary, KA Ganal; Union Consumer Affairs ministry-a joint secretary, Prasant Trivedi te an ṭhu a ni.

December 24, 2013:
@Chhun dar 12:30 velah Kolasib Vengtharah LPK tipper a chesual a, a khalhtu D Lalnunzira, Kolasib Vengthar a thi. Tipper hi kawng chhuka a tlan laiin motor lu chu hma lamah a bûk a, kawng kâwiah lei nawrin a chesual ta a ni.

@Krismas urlâwk zan a ni a, Aizawl khawpuiah lirthei intâi leh bike leh bike insú a awm nual a; lirtheia chetsualna vanga hliam an awm nual. Lirtheia chetsualna vangin Aizawl Civil Hospital-ah emergency case 150 a awm a, Synod Hospital-ah emergency case 11 a awm bawk.

@Serchhip District Anti-Tobacco Squad-in Serchhip bazarah meizial zu an vâi a, mi 89 manin, pawisa an chawitir a, pawisa chawi tling khawm chu Rs. 1,910 a ni.

@Zan khan Lunglei Luangmual Presbyterian kohhran biak-inah misual an lut a, maichâma Bible an h^l. Hemi chungchangah hian Lunglei Police Station-ah FIR thehluh a ni.

December 25, 2013:
@Krismas a ni a, kohhran tawm berin Pathianni anga serhin inkhawm an nei a, chawhma inkhawm banah Krismas lawmna thingpui ruai an ṭheh hlawm. Kohhran ṭhenkhat chuan ruaipui an ṭheh nghal bawk.

@Kohhran Thianghlim chuan Chawlhhmuna Solomon-a Temple-ah Jerusalem Inkhawmpui an hmang ṭan a, thupui chu 'Hnehna chu Lalpa ta a ni' tih niin, executive chairman, Dr LB Sailo-in thuchah a sawi ṭhin a ni.

December 26, 2013:
@Zing dar 2:30 velah Zodin Square-a Mahatma Gandhi lim bul kawng kual laiah R-15 bike MZ-01 F-5863 a chesual a, bike khalhtu Jacob Lalnunthara (21) s/o C Lalthanmawia, Dinthar-I leh bike hnunga chuang Zodinthari (14) d/o Zahmuaki, Vaivakawn Zohnuaite a hmunah an thi nghal.

Police-te sawi danin, bike hian kawng kual laiah a hmaa tlan truck AS-19 C-3768 chu an tlan pelh mek laiin a tlu a, truck chuan a chil zui a ni. Truck driver Bipul Koch (32) s/o BC Koch, Goalpara, Assam leh truck-a chuang ve mi dang pahnihte chu police-te'n an man.

@Kohhran tam berin Krismas lawmna ruai an ṭheh.

@Tlai dar 3 velah Sentetfiang, Lawngtlai district-a Tluangzela in a kâng a, bungrua chuh hman lohin a kâng ral a, mihring thi leh hliam erawh an awm lo.

December 27, 2013:
@Zan dar 10 velah Khawpuar maxi-cab, MZ-01 D-1458, Aizawl aṭanga haw lam chu Darlawn leh Sailutar inkara Sinlung Hills Development Council gate bulah chesualin, kawng thlangah metre 108 vel a lum a, mi 12 zinga pakhat, Thangdailovi (32) w/o Sumlianthanga, Khawpuar chu a hmunah a thi a, mi dangte an hliam bawk.

Maxi-cab chetsual chhan hi motor steering a in lock vang nia sawi a ni a, chetsual laia motor khalhtu Lalbiaknunga chu vak chhuak hmasa berin, Sailutarah a zualko a, chumi hnuah Sailutar khawtlangin chhanchhuah hna an thawk a ni. Lalbiaknunga chuan, motor-a chuangte chu motor lum tawp hmain a vawrch chhuak vek tih sawiin, "Motor lum tawpna thleng awm vek ila chuan dam chhuak kan awm lo ang," a ti. Motor-ah hian naupang pathum an cuang tel a ni.

Hliam dang, Lalneihawma (23) Khawpuar chu Aizawl Civil Hospital thlenpui a nih hnu ah, December 28 zing dar 8 velah a hliam tuar loin a thi ve leh bawk. Lalneihawma hi chetsualna hmuna thi Thangdailovi nau chiah a ni. THLALAK

@Mizoram Gorkha Youth Association-in Ṭhuampuia Oasis Hall-ah General Conference vawi 37-na an hmang a, Health minister, Lal Thanzara'n a hmanpui.

Lal Thanzara chuan, Mizoram sorkarin hnam tlem leh tênau zawkte a ngaihsak ṭhin tih sawiin, Gorkhali-te pawh hnam tlem zawk, minority an nih angin a ngaihsak tih a sawi a; Mizoram inpumkhatna tichhe loa mahni hnam ziaráng ṭheuh humhim tur leh, Mizorama intimikhual lo turin a chah.

Mizoram Gorkha Youth Association hi August 18, 1976-ah din a ni a, Mizoram pumah branch 15 leh sub-headquarters pakhat an nei a, member 3,000 chuang an awm a ni.

@Zanah Bungkawn, Aizawl-in an veng kâwnah 'Kawn mawi zan' an hmang a, an veng mite bakah, veng dang aṭangin mi ṭhahnem tak an tel. Kawn mawi zanah hian Bungkawn veng mi eng emaw zat chu danglam tak takin an inthuam a ni.

December 28, 2013:
@Mizoram sorkarin Sairang Dinthar-a Mizoram Football Association tana ram a pek chu MFA hruaitute'n an president, Lal Thanzara, minister hoin a hmunah an en a; minister Lal Thanzara hi minister Lalrinmawia Ralte leh parliamentary secretary, KS Thanga ten an ṭawiawm.

MFA president chuan, khelmual laih sa hi Sairang Dinthar khawtlangin Mizoram State Sports Council-ah an pe a, chu chu chief minister-in MFA hnenah a pe leh chhawng tih a sawi a; khelmualah hian Football Training Centre changtlung tak din an tum thu a sawi bawk.

Lal Thanzara sawi danin, MFA khelmualah hian hostel changtlung tak din tum a ni bawk a, DoNER leh NEC-ah sum an dil mek a ni.

@Khawthlang Tuipuia Tlabung aṭanga km. 5 vela hláa intihlima kal, Tlabunga Mizo ṭhenkhat chu Bangladesh lam mi nia hriatte'n ûmin, hmanraw ṭhenkhat nen an rîkrâp a, buaina nasa zawk a chhuah hmain Mizote chu an insaseng hman. Mizote hi Bindasora bul, Bandor Quarry lî-a lawnga an chuan laiin a râl lehlama Bangladesh Chakma mi ṭhenkhatin talhtum an ûm thut a, Mizote chu an chuanna meilawng hmangin an tlânchhia a, kâwi eng emaw zât an inûm hnuah ram dang mite chuan an ûm pha ta lo a ni.

@Lallianzela (11) s/o Lalruatmawia, Keiṭum chu chawhnu dar 2 velah Tuichang luiah a tla hlum. Lallianzela hi a pate'n hna an thawhnaah, an huana limbu lo turin an hruai ve a, an chawlh laia an huan bul Tuichang luia an inbual chu a chesual ta nia thu dawn a ni.

@Facebook User Group-te'n Serchhip khawpui chhunga awmte inpumkhatna tihṭhat nan tiin, Serchhip khawpuiah two wheeler rally an nei a, lirthei ke hnih nei chi 100 vel leh motor pangngai eng emaw zat hmangin kawng an zawh. Kawngzawh hi chhim lam kawtchhuaha Sailiamkawn aṭanga ṭanin, hmar lam kawtchhuah Chhiahtlangah an tawp a ni.

@Kohhran Thianghlim ṭhalai, Youth Evangelical Front-te'n Solomona Temple-a Jerusalem Khawmpui, ni thum chhung awh an hman zawh hnuah Aizawl Civil Hospital-ah thisen unit 325 an pe a, a petute hi mipa 259 leh hmeichhia 66 an ni.

December 29, 2013:
@Kumin 2013-a Pathianni hnuhnung ber a ni a, sunday school hrang hrangah kum 2013 chhunga kai kimte lawmman hlan a ni. Kohhran tam takah chuan naupang leh puitling sunday school-ah kai kim lawmman bakah, vawi khat kal lo leh vawi hnih kal lote tan lawmman siam a ni.

@Excise & Narcotics enforcement-te'n chhun dar 1 velah Millenium Centre bulah heroin gram 16 an man a, a neitu Vanlalhmangi (31) Tahan ‘C’ Group, Myanmar inti an man bawk. Heroin an man hi Mizoramah Rs. 50,000 vel hû a ni a, Vanlalhmangi'n hralh a tum mek laiin an mansak a ni. THLALAK

@Aizawla Hrangbana College-ah UGC hnuaia National Eligibility Test (NET) exam neih a ni. NET exam hi zing dar 9-ah ṭan a ni a, chawhma lamah paper-I leh paper-II te exam niin, chawhnuah paper-III exam a ni. NET exam-ah hian subject 31 a awm a, Mizoramah chuan exam hmachhawntu mi 1,253 an awm a, chung zingah chuan visually handicapped mi pathum an tel.

@Mizo High School-ah Staff Selection Commission hnuaia stenoghrapher group C leh D hna lakna tur exam neih a ni a, mi 146-in exam an hmachhawn.

@Saihaa MTP Hall-ah Departmental Fashion Show zan hnihna neih a ni a, zawh nghal a ni. Show-ah hian Agriculture leh Environment & Forest deprtment hmalaknate phochhuah a ni a, Naom-i Arts of Fashion bultuma neih a ni.

December 30, 2013:
@August 10, 2013 zana a nupui, K Zohmangaihi that a, Sakawrhmuituai khâma paihtu, Lalremruata Ralte, Zarkawt chu Court-ah a inlan a, January 13, 2014-a Court-a inlan leh tura tih a ni.

Addl. District & Sessions court-a Lalremruata Ralte a inlan lai hian, court tualah Biate Welfare Society member-te an pungkhawm a, an treasurer, K Zohmangaihi thattu a pasal Lalremruata Ralte chu a phu t^wka hrem ngei turin Court an phût a ni. THLALAK

@Zan dar 12 velah Young Lai Association (YLA), Lawngtlai College Veng branch chuan Silchar lam truck, AS-11 AC-5859 aṭangin sap zu ûm 672 an man. Truck khalhtu, Amar Hussain, Silchar chu YLA-te'n an man hmain a tlanbo a, second driver leh vai pakhat erawh an man nghal thung. Truck-a chuangte hi police kutah an hlan a; zu erawh chu December 31 tlai khan an leihbua a ni.

@Hranghleia, Khawbung chu a ṭhiante nen Samthang rama Sazuklui hnára sanghal an z$mnaah an ṭhiante'n an kap hlum palh. Thu dawn danin, sa an zîmnaah hian Hranghleia hi a luh chhuaktu zingah a ṭang a, sanghal lo chângtu, Thangtinliana chuan sanghal a kahna lamah Hranghleia chu a nâk vei lamah a kap a, Hranghleia chu a hmunah a thi nghal a ni. Thangtinliana hi Dungtlang Police Station-ah a inpe a ni.

December 31, 2013:
@Kum 2013-a ni hnuhnung ber a ni a, tlaiah mi ṭhahnem takin ni tla an en liam. Zanlai dar 12-ah kum thar lawm nan sorkar ruahman angin, police-te'n Durtlang, Laipuitlang leh Tuikhuahtlangah hâlmawi an hal a ni. Sorkarin hâlpuah leh hâlmawi lam chi reng reng hâl khap mah se, halpuah hal eng emaw zat an awm a ni.

@Zan dar 10-ah sorkar ruahman angin, district khawpui tinah intihhlimna hun buatsaih a ni. Aizawlah chuan Ramhlun North, Mission Vengthlang leh Vaivakawnah intihhlimna buatsaih a ni a; district headquarters tinah pawh buatsaih niin, a buatsaihna senso chu sorkarin a tum a ni.

Saiha-ah chuan sorkar sum pek hmangin Mara Hosape-in Bazar traffic point-ah 'Free New Year Countdown Concert' an huaihawt a; Lawngtlaiah chuan Central YLA bultumin Areopagi-ah free concert buatsaih a ni.

Lungleiah chuan YMA sub-hqrs-in LAD office kawt zawlah intihhlimna hun an buatsaih a, senso atan Fire & Emergency Service department-in Rs. 60,000 an thawh a ni. Serchhip-ah chuan New Serchhip community hall-ah YMA sub-hqrs ruahman angin intihhlimna hun hman a ni a; senso atan sorkarin Rs. 50,000 a pe.

Champhaiah chuan Awmpui Vengah 'Free New Year Countdown Concert' buatsaih a ni a; Mamit-ah chuan Chhim Veng YMA Hall-ah New Year Countdown Concert neih niin, senso atan sorkarin Rs. 50,000 a pe a ni.

@Champhai District MJA-in an silver jubilee an lawm ṭan a; MJA office-ah a khuh hawnna programme an hmang. He hunah hian mipuite thil pawimawh hrilhhriat kawnga nasa zawka ṭan la zel tura an infuih bakah, an pawl member thi mi pathumte sûnna hun hmang a ni. Champhai District MJA hi December 31, 1988-ah Champhai Journalists Association tih hming pu-a din a ni a, kum 2006-ah MJA-ah an inchhung lut a ni.



Share this Post

Login to comment
No Comments