Sorkar office-te'n parking an neih theih nan YMA-in hma a la dawn Central YMA president thar - Lalbiakzuala

YMA General Conference vawi 68-na, Khawbunga neih chu nizan khan a ṭiak a, nimin khan Central YMA hruaitu thar turte thlan a ni a, president atan Lalbiakzuala, Khatla thlan a ni. Conference-ah hian Nilaini khan rorel inkhawm neih a ni a, "Sorkar department tinin anmahni office building-ah parking an neih theih nan Central YMA-in hma la rawh se," an ti.

YMA General Conference-ah hian nimin khan Central YMA office bearer turte thlan a ni a, inthlan hi CYMA president hlui, Lalchungnunga'n a kaihruai. Thlan tlinte chu: president - Lalbiakzuala, vice president - Vanlalrema Rokhum, general secretary - Vanlalruata, assistant secretary - Lalhmachhuana, treasurer - J Lalsailova leh  finance secretary - Lalrochhuanga Pachuau te an ni.

YMA conference-ah hian Nilaini khan CYMA president, T Sangkunga kaihhruaiin pandal-ah rorel inkhawm neih a ni a, rorel palai 1,373 an tel. Kum 2014 kumpuan atan 'Ram leh hnam humhalh' tih thlan niin, 2014-a YMA General Conference neihna hmun atan Ratu thlan a ni a; rorel ṭan hmain nikum leh kumina YMA General Conference inkara YMA member thi mi 584-te sunna hun hman a ni.

Nilaini zana vantlang inkhawmah hruaitu hlun chawimawina, kumpuan bawhzui ṭha leh branch YMA chanchinbu ṭha lawmmante hlan a ni a; Mount Everest-a Mizo láwn chhuak hmasa ber - David Zohmangaiha leh Vanlalliana te leh Tlawng luia tuitla chhanchhuaktu, Vanlalbiaksanga Sailo, Kanan Veng, Aizawl te chawimawina hlan an ni bawk.

Niminah khan inthlan hlanin variety programme hman a ni a, Revd Chuauṭhuama'n 'Khua leh tuite mawhphurhna' tih thu a sawi bakah, zaithiam eng emaw zat an zat a, hnam lâm chi hrang hrang entir a ni. Nizan khan palai thlahna inkhawm neih a ni a, CYMA president kal chhuak T Sangkunga leh president atana thlan thar, Lalbiakzuala ten thu an sawi a ni.

Central YMA general secretary, Vanlalruata'n report a pek danin, tun dinhmunah YMA hian branch 796, group 46 leh sub-headquarters panga a nei mek a; member 3,89,557 an awm a, chungte chu mipa 2,32,435 leh hmeichhia 1,57,122 an ni. YMA hian Mizoram pawnah Assam, Meghalaya, Manipur, Nagaland leh Tripura-ahte branch a nei bawk.

CYMA finance secretary, J Lalsailova'n report a pek danin, Central YMA hian September 1, 2012 - August 31, 2013 chhung khan kum hmasa lama balance-te nen a vaiin Rs. 2,11,63,802 a hmu a, Rs. 2,06,18,402 a hmang thung.

Central YMA office bearer tharte:

President: Lalbiakzuala, Khatla

Vice president: Vanlalrema Rokhum, Zemabawk

General secretary: Vanlalruata, Tuikual South

Assistant secretary: Lalhmachhuana, Chaltlang

Treasurer: J Lalsailova, Mission Veng

Finance secretary: Lalrochuanga Pachuau, Zarkawt

YMA General Conference thu pass-te:

A.YMA KHAWIH

1.Central YMA buatsaih pêm lehkha kan hman mekah hian EPIC number ziah bakah, EPIC photo copy thil tel ni rawh se.

2.Pém nghet tur ni lo, zirna vang emaw, eizawnna vang emawa hun eng emaw chen hmun danga awm turte testimonial form inang tlang hman tur siam ni rawh se.

3.Chhiatni ṭhatni kaihhruaina ennawn ni rawh se.

4.Ram leh hnam humhalh nana pawimawh, intodelhna kan neih theih nan ei leh bar, sum leh paia inrenchemna (ecomonic management) pawimawhzia inzirtira hmalak ni se.

B.SORKAR KHAWIH

1.Sorkarin mau mahal a kalpui mek hi kum hnih emaw, kum thum emaw chhung chu mahal rih lo ni se.

2.Sorkar department tinin anmahni office building-ah parking an neih theih nan CYMA-in hma la rawh se.

3.The Mizoram Land Revenue Act & Rules 2013 hi a nihna ang taka kalpui ni rawh se.

4.Sorkarin dan loa khaw thar din chungchangah tun aia nasa zawkin hma la rawh se.

5.Lunglei to Lengpui Airport via Buarpui kawng hi tipuitling turin sorkarah thlen ni rawh se.

6.Mizoram sorkarin Water Resources Safety Reserve siam rawh se.

7.Tipaimukh Dam Multi Hydro Electric Power project siam tum hian kan ram tam tak a chîm dawn avangin, siam lo turin sorkarah thlen ni rawh se.

Kumpuan bawhzui ṭha:

Branch:1-naEdenthar branch, Aizawl

2-naMission Veng YMA ‘S’ branch

3-naNgopa branch

Group:1-naZobawk group

2-naSaitual group

3-naKhawzawl group

YMA chanchinbu ṭha:

1-naBungkawn Tlangau, Bungkawn Branch

2-naChanmarians, Chanmari branch, Aizawl

3-naMARIMA, Ramhlun North

YMA chanchinbu la ṭha:

Aizawl:1-naChaltlang branch

2-naKanan branch

3-naChanmari West

Aizawl páwn:1-naChamphai Kahrawt

2-naSaitual Chawnpui

3-naKhawzawl Vengthar


Share this Post

Login to comment
No Comments