PUC-in Lalnunsanga hnenah ‘Laisuih Award’ an hlan

Pachhunga University College (PUC) chuan nimin khan T.Melody vocalist Lalnunsanga hnenah ‘Laisuih Award’ an hlan. PUC hian thu leh hla hmanga Mizo hnam inpumkhatna atana thawhhlawk nia an hriatte hnenah chawimawina hi an hlan ṭhin a, Lalnunsanga, Tahan, Myanmar hnenah hian an hlan ve ta a ni. 

PUC hian nimin khan an college Multipurpose Hall-ah kum thum dana an neih thin ‘Cultural Day’ an hmang a, hemi puala an pek ṭhin ‘Laisuih Award’ chu Lalnunsanga hnenah hian an hlan. He Award hian chawimawina thuziak (Citation), Tophy leh pawisa fai Rs. 10,000 a keng tel a ni. Award dawngtu Lalnunsanga chuan, PUC-in hetiang chawimawina sang an hlan chu thinlung taka a lawm thu sawiin, "Keimah aia dawng awm tam tak an awm laia International Boundary pel a, Mizoram pawha seilian ni ve lo min chawimawi hi ka lawm takzet a ni," a ti. 

Lalnunsanga chuan Mizo hnam inpumkhatna chu a vei thu sawiin, hnmun hrang hranga Zofate chu inpumkhat a, inunau zel theih a duh thu a sawi bawk. Tunlaiah chuan zai tura an sawm pawhin Burma pawisa kyat nuai 20 (India pawisa cheng nuai khat) chinah lo chuan an kal tawh meuh loh thu sawiin, "Hnam inpumkhatna kan neih zelna tur nia ka hriat avangin chutiang chu phut loin ka lo kal a ni" tiin, Mizo hnam inpumkhatna a ngaihpawimawh thu a sawi bawk.

PUC hian hian thu leh hla hmanga Zofate inpumkhatna atana thawhhlawk, la dam lai ngeite hnenah ‘Laisuih Award’ hi an pe ṭhin. Kum 2011 khan hla phuahthiam Pu V.Thangzama hnenah an lo hlan tawh a, 2015 khan hranghlui zaithiam Lalnunmawia (Vatea) hnenah an lo hlan tawh bawk. Kumina Award dawngtu Lalnunsanga hian Pathian hla 14 leh lengzem hla 10 a phuah a, music album pali leh a huhoa siam album 10 zet a puitlin tawh a ni. 



Share this Post

Login to comment
No Comments