FA Cup : Huddersfield mualah Man United

Manchester United-in zanin dar 11:00 hian John Smith's Stadium-ah Huddersfield Town an tlawh dawn. Jose Mourinho hoten Newcastle United an hneh lo zo chiah a, Terriers erawhin zanina an khelhna tur stadium-a an match hnuhnung berah Bournemouth 4-1 in an hneh thung a, player manto rual awmna Man United hi chesual thei an ni.

FA Cup-ah team 16 chiah an dam tawh a, zanina fifth round inkhel tur pali zingah Premier League club pahnih West Brom leh Southampton te a hmuhnawm a rinawm. Tun hnaia harhtharna chang Swansea City-in Sheffield Wednesday an tlawh dawn a, Brighton & Hove-in Coventry City an mikhual bawk ang.

Kan tho chhuak dawn - Carrick
United-in player lakluh nan sum an seng hnem nachungin league-ah an champion theih a rinawm tawh lo a, season tharah Champions League an khelh phak rinawm mah se Newcastle an hneh loh avangin chesual thei an la ni.

Jose Mourinho hoten league leh Champions League lama inkhel pawimawh an hma­chhawn huna phur tharna nei turin FA Cup-ah in­tuaithar an mamawh a, club captain Michael Carrick chuan insiamṭhat an mamawh thu a sawi.

Kum 36 mi Carrick chuan, "Tun hnaiah result ṭha lo kan nei tih zep tur a awm lo a, sawi­selna pawh kan tawk. Amah­erawhchu kan chak loh miau chuan sawiselna pawh hi kan hma­chhawn theih a ṭul a ni. Kei leh ka khelhpui ten inkhelh leh hun hi kan nghakhlel a, thawhchhuah ngei kan tum a ni," tiin a sawi.

Terriers nena an inkhelh tur chungchang sawiin Carrick chuan, "Knockout a ni a, league match nen a dang hlak. Huddersfield hi Premier League-ah an che ṭha a, cup-ah pawh chet ṭhat an tum dawn. An tan chuan inkhel pawimawh a ni a, chutiang bawk chuan kan tan a pawimawh. Inkhel a awlsam dawn lo tih kan hria a, kan theihna zawng zawng kan chhuah ang," tiin an chetsual theih a nih thu a sawi.

Engtin zel?
United hian fifth round thleng turin Derby County leh Yeovil Town te an hneh a. Zla­tan Ibrahimovic leh Eric Bailly te chu tun thla tawp hmain an rawn let theih beisei a ni a, amaherawhchu khup hliam vanga zai tawk Marouane Fellaini te nen Huddersfield Town an la hmachhawn theih a rinawm lo.

Newcastle an hneh loh ṭuma hliam vanga inlan thei lo, Mar­cus Rash­ford leh Ander Herrera te erawh an khelh theih a rinawm tawh. Huddersfield pawhin Cherries 4-1 a an hneh ṭuma inlan thei lo Tommy Smith chu an chhawr theih tawh hmel a, Chris Lowe leh Laurent Depoitre te erawh an la khel thei lo ang.

United hian Huddersfield hi tun thlatir khan Romelu Lukaku leh Alexis Sanchez te goal hmangin 2-0 in an hneh a, amaherawhchu John Smith's Stadium-ah erawh Terriers hian United hi 2-1 in an hneh ve thung.

Zanin hi United inkhela VAR an hman hmasak ber tur a ni dawn a, Mourinho chuan video assistant referee chu match official te duh dan a nih phawt chuan ṭha a tih thu a sawi a, amaherawhchu thil thleng dan a zirin Portuguese manager sawi zui dan a dang ve thei bawk.

Inkhel dang
Hawthorns-ah mikhual Southampton chu mualneitu West Bromwich Albion aia rinkai zawk an ni. Tun thla tir khan Saints hian 3-2 in hnehna an chang a, amaherawhchu league lamah relegaton zone-ah an awm ve ve avangin FA Cup aiin Premier League lamah an rilru an pe zawk ang.

Brighton-in Falmer Sta­dium-ah League Two club Coven­try City an mikhual dawn. Brighton tan round sang zawk thlen theihna hun ṭha awm mah se Premier League lam ngaihthah a thiang lo a, Coventry pawhin League Two playoff khel turin league lam an ngaihthah a thiang lo.

Swansea-in Tottenham an hneh loh hnuah Liverpool leh Arsenal an hneh thei a, fifth round lut turin Notts County chu 8-1 zetin an sawp. Amaherawhchu, Swans hi league lamah point khat chauhin an la him a, Championship club Sheffield Wednesday tan upset thlen theihna hun ṭha a ni thei ang.