British football-a club inhal ber pahnih

Infiamna chanchin ziak ṭhin SPORTbible chuan twitter kaltlangin British football-a club inhal ber chungchangah poll a la a, pakhatna chu Manchester United leh Liverpool te an ni. 

He poll-ah hian Manchester Derby emaw Merseyside Derby a lang pha lo a, Celtic leh Rangers chu pahnihna niin Tottenham leh Arsenal chu pathumnaah an awm. SPORTbible kaltlanga mi ṭhenkhat ngaihdan chauh ni mah se vote thlak ve lote pawhin an pawm thlap a rinawm.

Liverpool leh Manchester United inhuat ṭanna hi khelmual pawn lamah a ni. Kum 1890 chhoah khan England-a khaw pahnih hi sumdawnna kawngah an ṭhang nasa em em a, Manchester hi puanthan sumdawnna vanga hlawk an nih laiin Liverpool hi lawng chawlh hmun lar niin khawvel lawng lar Titanic, Carpathia leh Californian te kha Liverpool-a in register vek an ni.

Mahse, Manchester-in a hnu rei loteah lawng chawlh hmun an sual chhuak a, sumdawng lawng tam zawkin Manchester lama innghah an thlang. Liverpool khawpui sum lakluh a tlem phah a, ṭhalai tam takin an hna an chan - khaw pahnih inhuatna chu khelmual chhungah put luh a ni a, vawiin thlengin khawvela club inhaw ber pahnih an ni ta.

Manchester United leh Liverpool inkarah vawiin thlengin player pakua chiah transfer an la ni! Kum 1964 khan Phil Chisnall chuan United aṭangin Anfield a pan a, club pahnih inkara transfer hnuhnung ber a ni. 

Kum 2007 khan Reds-in United aṭangin Gabriel Heinze lakluh an tum a, Argentine defender hian Anfield pan a duh thu ualau takin tilang mah se Sir Alex Ferguson-a'n Real Madrid lamah a kaltir daih! An hmelma club hi an player duhzawng pek a tum lo.

Liverpool manager ropui Bill Shankly-a'n a hunlaiin Celtic aṭangin Lou Macari lakluh a tum a, Scottish midfielder hian United a thlang zawk. Shankly hian a hnuah, "Ka tan pawina a awm lo, reserve team-in kan mamawh vanga lakluh tum mai ka nia," tiin a sawi a, club inhal zia a sawi fiah.

Club pahnih hi English club hlawhtling ber niin an inchhal ve ve. 90s hmalam kha chuan Liverpool hi club hlawhtling ber an ni a, inhnialna tur a awm lo. Reds hian Premier League awm hma khan English Division 1 nomawi vawi 18 zet an chawi tawh a, hetihlai hian United chuan English Division 1 nomawi pasarih chauh an la la.

April 1992-ah Manchester United chu champion thei dinhmunah ding mah se Liverpool-in Anfield-ah 2-0 in an hneh. United-in kum 25 chhung league nomawi an chawi thei danw lo tih a chian avangin Kop an hlim a, hetah hian Ryan Giggs chu United tan a khel tawh. Wales coach ni ta Giggs chuan, "Ka signature min dil a, ka ziah sak hnuah ka hmuh lai ngeiin an pawt thler," tiin boruak ṭan ṭhat zia a sawi chhuak.

United manager Alex Ferguson chuan, "Kan duh aia tam min ziritir a, hei hi a tawpna ni rawh se," tiin a naute a zilh. Season dawt leh chiah ṭantirhah Ferguson chuan dressing room-ah Dante (Inferno) ngui hmel thlalak chu a tar a, Liverpool nena thil thleng chu thleng nawn tawh lo tura a duhzia sawifiah nan a hmang.

Italian writer  Dante Alighieri thuziak Inferno (hremhmun)-ah chuan Dante-a'n hrehmun kawng a zawh dan a chuang a, hemi behchhan hian Ferugson-a'n a naute a fuih. United chuan Premier League hmasa ber nomawi chu an chawi a, kum 1994-a Anfield  an tlawh ṭumah  Kop hoin, "United leh Cantona mangṭha rih phawt le. League nomawi 18-in chawi hunah inlo kir dawn nia," tiin an tham lo hle.

Ferguson chuan he thuziak hi a la na ngang mai. Kum 2002-a league title 15 chiah an la neih lai khan Ferguson chuan, "Ka tana chona ropui ber chu an lalṭhuthleng aṭanga Liverpool paih thlak hi a ni. In duh chuan in chhinchhiah thei ang," tiin a chhanglet. Kum 2009-a United-in league title 18-na an lak leh chiah khan United chuan, "Nomawi 18 in lak hunah rawn kir leh turin minti si a, ka rawn let leh ta e," tiin an tih el.

Kum 2010-a Chelsea-in champion nomawi an chawi theih nan Steven Gerrard-a'n Blues striker Didier Drogba-a lo pass sual 'der' tawh a, United-in nomawi an chan phah a, league nomawi an chawi zat a inang zel. Kum 2011-ah erawh Liverpool tan dan rual an ni tawh lo, Ferguson hoin  league nomawi chawi belhin kum 2013-ah a dang lak belh lehin league nomawi vawi 20 an chawi.

Liverpool fan-ten Steven Gerrard an ngainat em em chhan pakhat chu a thiamna piahlamah United huatna thinlung nghet tak a neih vang niin a lang. Captain Fantastic hian, "Ka naupan lai aṭang tawhin United haw tur ngawr ngawra zirtir ka ni a, club hrang hrang jersey ka inah hian hmuh tur a awm. Mahse, United player erawh ka jersey ka thlengpui ngai lo a, ka in chhungah hian Manchester United jersey-in hmun a chang tur a ni lo," a ti!

Sir Alex-a'n Gerrard chu player ṭha nia a hriat loh thu a sawi pawh khan Gerrard hian, "United tana khel tura min sawmtu kha a ni a, muttui loh phah nan hmang lo mah ila khatia a thusawi a zuk leh kha chu mak ka ti a ni," tiin Scottish manager hi a lo kap tawh.

Amaherawhchu league nomawi an chawi miau loh avangin Liverpool ṭanhmun a phet a, an chhuanvawr ber Stevie G pawh kum 2014-a nomawi an thlauh ṭuma mawhphurtu berah a ngaih theih. Gerrard hi Chelsea an hmachhawn ṭumin a tlawh thlu a, Blues forward Demba Ba-a'n goal-ah a chantir avangin Reds-in nomawi an chawi loh phah. Tun thlengin English club zinga ropui bera inchhal Liverpool-in Premier League nomawi an la chawi lo.

Jurgen Klopp hnuaiah Liverpool-in harh tharna an chang a, champion thei dinhmunah an ding mek. Reds hi table-ah pahnihna ni mek mah se tun Pathiannia an hmelma Manchester United an hneh chuan khelh zat inangah Manchester City chungah an awm dawn. 

Liverpool hian Old Trafford-a United an hneh a, a vawi khat nan Premier League nomawi an chawi bawk chuan Klopp-a hote leh Kop ten 'vanram tlafual' an tem ngei ang.