Hnahthial dist-ah ráltlân 2,298 awm mek

Hnahthial District Raltlan Committee chu nimin khan an ṭhukhawm a, Myanmar ráltlânte chungchang an ngaihtuah. Hnahthial district-ah hian nimin khan Myanmar raltlan mi 28 an luh belh a, ráltlân mi 2,298 an awm mek.

Myanmar ráltlânte chu sorkar anga buaipui a remchan loh avangin Hnahthial DC leh SP-te chuan tlawmngai pawlte leh khawtlang hruaitute chu raltlante chhinchhiah a, ṭanpuina leh chhawmdawlna mumal leh rualkhai taka pek a nih theih nan Hnahthial District Raltlan Committee din turin an ràwn a ni.

Nimina ṭhutkhawm hi Committee chairman B Lalhmingliana'n a kaihruai a; ráltlânte chhawmdawlna turah district-a sorkar hotute an inhawn thu leh ṭanpuina sum pe duh tan Mizoram Rural Bank-ah account no. 97012884509 hawn a nih thu a sawi.

Ṭhutkhawmah hian, hun remchang hmasa berah ráltlânte awmna khuate tlawh an rel a, anmahni chhinchhiah bakah, an dinhmun chiang taka hriat tum ni se, an ti.

Hnahthial DC pisa chhinchhiah danin, nimin khan Hnahthial district-ah Myanmar aṭangin ráltlân mi 28 an luh belh a; chu'ngte nen chuan Hnahthial district-ah ráltlân mi 2,298 an awm mek a, chhungkua anga chhinchhiah theih chu chhungkaw 405 an ni.