Belarus-ah Maradona-a'n hna thawk dawn

Diego Maradona chu Belarusian club Dinamo Brest tan chairman a ni dawn a, kum thum daih contract a ziak. June 14 aṭanga khelh tur FIFA World Cup zawh aṭangin a hna hi a thawk ṭan ang. 1986 World Cup-a Argentina champion puitu Maradona hna thawh ber tur chu club-in hma a sawn theih nana hnathawh a ni dawn.

Kum 57 mi Maradona hian thla hmasa khan United Arab Emirates second division club Al Fujairah coach a nihna aṭangin a bang. 2008 aṭanga 2010 chhung khan Argentina enkawl hna a lo thawk tawh bawk a, coach hlawhtling tak ni rih lo mah se hna thawh tur erawh a haihchham lo.

Dinamo hi Poland ram ri depa awm Belarus khawpui pakhat Brest behchhana din a ni a, tun dinhmunah chuan Belarusian Premier League-ah pariatna an ni mek - Inrinni zan hian Bate Borisov nen Belarusian Cup final an khel dawn.