Zanin aṭangin Premier Badminton League

Khawvel badminton tournament zinga sum tamna ber Premier Badminton League chu zanin aṭangin khelh ṭan a ni dawn a, dar 7:00 aṭangin Star Sports HD 1 leh Star Sports 1-ah en theih a ni ang.

January 14 thleng awh tur inelna hi India ram khawpui hrang hrang Delhi, Lucknow, Chennai leh Hyderabad-ah te khelh kual a ni dawn a, match hmasa ber hi Guwahati-ah khelh tur niin champion lai Chennai Smashers leh Awadhe Warriors te an inkhel nghal dawn a ni. Chennai Smashers tan PV Sindhu a inlan dawn a, Awadhe Warriors lamin Saina Nehwal an neih bawk avangin Indian shuttler langsar pahnih inkhel kan hmu nghal dawn.

World Championships silver medallist Sindhu hian season hmasa khan Smashers hi a vawi khat nan PBL-ah a champion pui a, inrintawkna nen bul an ṭan ang. Kumin Senior National Championship final-ah Sindhu hi Saina lakah a chak lo a, player pahnih hi an inhlau lo tawn hle tura ngaih a ni.

Awadhe Warriors hian season duhawm hmangtu Srikanth Kidambi an la nei bawk. Srikanth hian tun season chhungin Super Series title pali a la a, Indian shuttler zingah ani aia record nei ṭha an awm lo; khawvel huap pawhin season khat chhunga Super Series title pali la thei player palina chiah a ni bawk.

Hmel thar

PBL-ah hian season danga kan la hmuh ngai loh kan hmu dawn, North Eastern Warriors leh Ahmedabad Smash Masters te tan an tournament vawi khatna a ni dawn a, hmar chhakah badminton inelna lian pakhat hi an khel ve tawh dawn a ni.

Badminton World Federation hnuaia neih ni lo mah se PBL-ah hian sum a tam miau avangi khawvel player ṭha a hip loh phah chuang lo. Kuminah pawh hian mipa leh hmeichhe world number 1 Viktor Axelsen leh Tai Tzu Ying te pawh an hmel kan hmu dawn a ni.

World number 1 pahnih bakah hian Lee Chong Wei, Lin Dan leh Olympic champion leh a hun laia world number 1 ni bawk Carolina Marin pawh a inlan tawh ṭhin. Kuminah hian Olympic medal dawng tawh player 10 zet an inlan leh ang.