MPL Best Player tan Mahindra scooty Best Player ni thei tur position tina player ṭha chhawp chhuak

Mahindra 2 Wheelers Mizoram Premier League-ah round khat chiah awm tawh mah se champion tur leh tla tur a la chiang lo a, tla tur pawh an la chiang lo - C mimal lawmman dawngtu tur phei chu an la chiang lo lehzual.

MPL Board chuan position tinah best player an thlang dawn a, goalkeeper, defender, midfielder leh forward ṭha berte hian nomawi leh Rs 5,000 an dawng vek ang. Best Player phei chuan Mahindra aṭangin scooty ṭha tak an dawng ang.

A thlan dan tur chu
MPL-ah hian Best Player in Scooty a dawn bakah Top Scorer leh position tina ṭha berin Rs 5,000 leh nomawi an dawng ang. 

MPL Board chuan lawmman dawng thei tur player 16 a thlan chhuah bakah a thlangtu tur expert 16 a ruat tawh bawk. Heng player thlanchhuahte hi MPL tawp ni, May 4-ah puanchhuah a ni ang. 

A thlan dan tur pawh ram danga an tih angin a thlangtute hian hming chhawp chhuah aṭangin an duh dan indawtin pakhatna aṭanga palina zel an thlang ang a, chuta a point hmu sang chu an tling ang.

Best Goalkeeper
Goalkeeper ṭha pali thlanchhuah hi hna harsa ni lo mahse pakhat thlan chhuah erawh a huphurhawm khawp ang le.

1. Lalawmpuia, Chanmari FC
Chanmari keeper OPp-a hi Chanmari tan MPL inkhelah a inlan kim vek a, an la thlak miah lo a, MPL-a khel tam ber a ni thei hial ang. Goal 11 chhuah tawhin goal chhuah tlem ber a ni a; goal chhuah loh ni (clean sheet) vawi li a nei tawh a, game tidanglam thei tur khawpa save pawimawh a nei nual.

2. Zothanmawia, Dinthar FC
Goalkeeper thlan chhuah zinga clean sheet nei tlem ber hian vawi khat chiah clean sheet nei mah se goalkeeper zinga man of the match vawi hnih ni thei awm chhun a ni thung. Boruak sangah a naupanna lang chhuak zauh ṭhin mah se Dinthar-in hma an hruai theihna tura an player pawimawh a ni.

3. Ramhlunngaia, FC Kulikawn
A chet dan mawi tak tak avanga mipui lawm hlawh em em Angaia hian clean sheet vawi li lai a nei tawh a; Chanmari goalkeeper dawta goal chhuah tlem ber a ni. Player tawnhriat ngah a ni a, leadership quality nei ṭha tak a ni a, team tana player ṭangkai a ni. 

4. Vanlalhriata, Mizoram Police FC
MPL goalkeeper zinga tawhhriat ngah ber Hriata hian vawi li clean sheet a neih tawh bakah man of the match-ah vawi khat thlan a ni tawh. First phase lama Mizoram Police-in khel ṭha vak lo chunga harsa taka point an hmuh thinna phêna player pawimawh tak a ni.

Best Defender
MPL-ah defender zingah hian goal thun thei an awm nual a,  tuna player thlan chhuah zingah hian goal thun an la awm lo a; mahse an tihtur goal ven lamah erawh player pawimawh tak takte an ni.

1. Malsawma Chhangte, Aizawl FC
Aizawl FC hian defensive midfielder ṭha an neih loh avangin Malsawma ṭangkaina hi a nasa zual a, player tlan chak tak ni lo mahse game a chhiar thiam avang leh ball kanga a ṭhat avangin Aizawl FC tlar hnung khai pa ber a ni. Man of the match-ah pawh vawi khat thlan a ni tawh.

2. Lalrinchhana, Chanmari FC
Rinchhana hi inhliam vangin round hnuhnung lamah che ṭha tawk lo mah se MPL-a goal chhuah tlem ber team an nih theihna tura an player pawimawh a ni. Player lian a ni lo a, he ti chung hian boruak-ah chuan elpha an tam lo khawp ang - a fighting spirit-in fak a hlawh bawk.

3. Zothanpuia, Chanmari FC
Goal chhuah tlem ber team Chanmari FC defender pahnih an thawh hi thil mak a ni lo. Thangpuia hi Chanmari tlar hnung inghahna a ni a, player  hmuhnawm ber chi ni lo mah se a game discipline a ṭhat avangin a ṭangkai a, an inkhel zawng zawngah a la inlan fai vek a, man of the match-ah vawi khat thlan a ni tawh.

4. Lalruatthara, Luangmual FC
Luangmual FC hi goal chhuah hnem tem an ni chungin an tlarhnunga rawlthar Ruatthara hi chuan MPL khelh chhungin faktu a ngah hle. He player hi tlar hnung-ah chuan mamawhna apianga khel thei a ni a, left leh right back-ah a khel thei a, a khelh tamna chu central defender-ah a ni.

Best Midfielder
Midfielder leh Forward hi position hran daih ni mahse player zingah hian midfielder leh forward-a khel kawp an awm nual a, formation hman azirin player ngai reng hi midfielder (winger) a ni thei a, forward pangngai ang pawhin an dah theih tho ang.

1. R. Laldanmawia, Dinthar FC
Player tlan chak, goal thun thei bawk Danmawia hian inhliam vangin match hnih ngawt khel thei lo mahse goal sarih a thun thei. Man of the match-ah vawi khat thlan tawh niin Dinthar hmatawng tihmingṭhatu a ni a, 4-5-1 formation an hman chuan midfielder a ni tlangpui a, 4-3-3 formation-ah chuan forward angin an chhawr thung.

2. Rohmingthanga, FC Kulikawn
Veteran player Rohminga hi upa deuh tawh mahse a thiam a la theihngilh loa. A khel hi mipui tan a hmuhnawm satliah lo a, team tan a ṭangkai tel bawk. Goal la thun lo mahse man of the match a zawnin vawi li thlan a ni a, Kulikawn innghahna a ni.

3. V. Lalṭanpuia, Mizoram Police FC
Mizoram Police defensive midfielder Ṭ-a hian goal a la thun lo a, man of the match-ah thlan a la ni hek lo. Chuti chung chuan Mizoram midfielder ṭha an sawi apiangin a hming an hmaih ngai lo. Ani hi Mizoram Police tlar hnung leh tlar hma ṭhui khawmtu a ni.

4. Zion Lalramluaha, Reitlang FC
Reitlang captain Zion-a hian team hruaitu nih a tlin hle a, Mizoram Police laka point pawimawh tak hlawhchhuak turin goal mawi zet mai a khung a, man of the match vawi khat a ni tawh. Reitlang inkhelah a lang kim deuh vek a, season tawp ni-a him thei dinhmuna Reitlang dahtu a ni. 

Best Forward
Goal khung thei hlir dahkhawm an ni a, heng player thlan chhuah palite hian an team-te chu a sang pathumah an hlang kai vek bawk.

1. MS Dawngliana, Chanmari FC
Dawngtea hi season chawhma lamah player langsar ber ni lo mahse Dinthar lamah chakna goal khungin man of the match-ah thlan a ni. Season chawhnu lamah harhtharna changin a zawnin man of the match-ah vawi thum thlan an ni a, match thum chhung lekin goal sarih a khung bawk a, a pumpuiah goal kua (9) thunin top scorer a ni mek.

2. Lalnunmawia, Dinthar FC
Mawitea hi boruakah leh leiah a hlauhawm kawp a, goal ruk khung tawhin man of the match-ah vawi thum thlan a ni tawh. A zawnin match thum goal khung tawh lo mahse heng match thumahte hian player hlauawm ber pawl a ni a; Dinthar hi an champion a nih chuan an player paiwmawh bera chhal ngam a ni hial ang?

3. F. Lalrinpuia, Mizoram Police FC
Goal sarih thun thei Mizoram Police striker Valpuia hi man of the match-ah vawi hnih thlan a ni tawh. He player tharum ngah tak hi striker ni mahse Mizoram Police midfield tichak tura taima taka tlan lêt reng peih a ni a, mamawh huna midfielder anga chhawr theih a ni.

4. Lalbiakhlua, Mizoram Police FC
Biaktea hi player tlan chak a ni satliah tawh lo a, goal thun thei tak player a ni a, goal thun tura ṭhiante siamsak thei tak a ni. Goal ruk thun tawhin man of the match-ah vawi hnih thlan a ni tawh a. Police-in point hlu tak an hlawh chhuahna kawngah chakna goal a khung nual.

Top Scorer tur a chiang tawh?
MPL Round 13 khelh zawh tawhah hian goal 138 a lut tawh a, match tina goal 2.65 lut ang a ni. Own goal vawi thum tiam loin player 69 in goal an thun tawh a; hattrick siam erawh pahnih chiah la awmin Mizoram Police striker F Lalrinpuia leh Chanmari FC striker MS Dawngliana-te an ni.

Dawngtea'n goal kua (9) thun tawhin a thun tam ber a, a dawtah hian goal sarih (7) thun tawh Valpuia leh Dinthar winger R Laldanmawia-te an awm. Anni dawtah hian goal ruk (6) thuntu Mizoram Police attacking player Lalbiakhlua leh Dinthar forward Lalnunmawia-te awmin, Mizoram Police player tho C Lalnunmawia'n goal nga a thun tawh bawk.

Hattrick vawi hnih chiah awmna MPL a ni si a, game khat chiah awm tawhin Dawngtea hi top scorer ni turin a dinhmun a ṭha tawh hle a; nimahsela football-ah engmah thleng thei lo a awm lo.

Club aṭangin mimal
Best goalkeeper, best defender, best midfielder leh best forward lawmman dawng thei tura chhawpchhuah zingah FC RS Annexe player atangin an lang lo. Chanmari FC leh Mizoram Police FC ten player thawh hnem berin pali ve ve an tawh a, Dinthar FC in player pathum an thawh a, FC Kulikawn in player pahnih an thawh bakah Reitlang FC, Aizawl FC leh Luangmual FC ten player pakhat ṭheuh an thawh bawk.

Tunge scooty dawng ang?
Player 16 thlanchhuah zinga tu emaw ber hi chuan scooty an dawng dawn. Round 14-na khelh hmabak a la awm a, chumi a zirin chuan a dawng tur pawh hi a la dang thei ngeiin a rinawm.

Best Player hi Round 1 aṭanga Round 14 an inkhelh chhunga che ṭha tluang thlan tur a nih hmel a, vawi leh khata che ṭha hluai ringawt chu season tluana ṭha bera thlan an harsa mai thei. Heng player 16 zingah pawh hian tling tura rinkai bik an la awm hrang leh ngei ang.



Share this Post

Login to comment
No Comments