Formula 1 Japan-ah Lewis Hamilton tan fiahna

Lewis Hamilton chuan chuh buaitu awm loin Formula 1 champion lallukhum a khum mai dawna a lan tawh laiin kar hmasa khan Singapore Grand Prix-ah intlansiak a tlan tluan thei lo a, Pathiannia an tlan tur Japanese Grand Prix-ah a chesual leh a nih chuan a dinhmun a him tawh lo ang.

Driver championship-ah Hamilton leh amah hnaih bertu Nico Rosberg te hi point 41-in an inthlau mek a, pathumna Ferrari driver Sebastian Vettel chuan point 46-in a la phak lo thung. Tun season-ah point 150 ngawt hmuh theih a la awm avangin season tawp lamah champion tum inum boruak a sang chho mek a ni.

Japanese Grand Prix an tlanna tur Suzuka tlankawng hi km 5.807 a thui niin kum 1987 khan a vawi khat nan Formula 1 intlansiak neih a lo ni tawh. Lap 53 tlan tur niin kawng kawi 18 chauh a awm avangin car nei ṭha tan kawng ngilah chet ṭhatna hun a awm tura ngaih a ni.

Kum 2014 khan mipui 142,000 zetin intlansiak an en a, kuminah pawh hian khuain a bumro a nih pawhin mipui an kal khawm tlem lo tawp ang.

Kum dang zawng aiin kumin Japanese Grand Prix hian ngaihven a hlawh zual dawn a, a chhan chu nikum khan helai hmunah hian lap 43-naah Williams driver Adrian Sutil chesualin, a car hnuk sawn tur hian recovery vehicle an rawn lut. A hnunga rawn tlan Marussia driver Jules Bianchi chuan kawng nal avanga a car thunun zo loin recovery vehicle hi na takin a su. Bianchi hian a luah hliam na tak a tuar a, rang takin Mie General Hospital-ah hruai nghal a ni.

A hliam a nat em avang leh a harhchhuah theih mai loh avang hian a nu leh pa te chenna Nice, France-ah hruai a ni a; kum 25-a upa Bianchi hi dam leh ngei tura theihtawpa an enkawl laiin July thla khan a boral ta a ni.

Nikuma Suzuka tlankawnga hnehna changtu Hamilton chuan, "Suzuka tlankawng hi khawvela a ṭha berte zinga mi ni mah se ruah surin a tih huh ṭhin avangin vur chunga intlansiak ang mai kan ni ṭhin. Nikum khan chhiatna rapthlak a lo thleng tawh a, kuminah chuan khatiang thil ka a thlen tawh loh hram ka beisei," tiin a sawi.


Share this Post

Login to comment
No Comments