Covid-19: Manipur-ah mi 60,000 enfiah tawh

Manipur chuan an state-a Covid-19 lut tur venna atan, an state tlawhtu mi 60,000 chuang chu he hri hi an kai leh kai loh an enfiah tawh.

 

Mi 60,000 chuang an enfiah aṭang hian rinhlelh thilah mi 10-te sample chu enfiah zui turin lak a ni a, an zinga pakua chuan he hri hi an kai lo tih finfiah a ni tawh bawk. Mi pakhat result erawh chu la nghah mek a ni. Hemi rual hian mi 377-te pawh an dinhmun enthlak zui mek a ni tih Manipur health director K Rajo chuan a sawi. 

Health director chuan an state-a Covid-19 lut tur venna atan han border town hrang hrang leh Imphal International Airport-ah endikna tur, centre dah vek a ni tih a sawi bawk. Covid-19 venna, vaccine a la awm loh avangin hri lut lo tura invenna ṭha thei anga kalpui chu tihtur awm awmchhun a ni rih tih Rajo chuan a sawi bawk. "Inven hi tihdam aiin a ṭha zawk", tiin he hri leng mek laka inven dan tur hrang hrangte a sawilang bawk a ni.