Hmeichhe thawmhnaw inbel leh pawngsualin inkungkaihna nei lo - Defence Minister

Defence Minister Nirmala Sitharaman-i chuan pawngsual thleng ṭhin zinga tam takah pawikhawihtu chu an chhung hnai leh ṭhian te an nih avangin agency-te tan pawh a veng tura an tih theih a tlem ṭhin niin a sawi a, hemi rual hian hmeichhiate thawmhnaw inbel dan azira pawngsual thlen phah ṭhin nia sawi chu a pawm loh thu a sawi bawk.

Thawhṭanni tlaia New Delh-a hun a hmanpuinaah he thu hi minister chuan a sawi a ni. Pawngsualna tam tak chu pawn lamah ni loin inchhung khurah a thlen ṭhin avangin agency-te tan pawh eng anga hma lak nge ngai dawn tih a zawt nghal a ni.

Minister chuan pawngsualna thleng ṭhinah mi ṭhenkhatin hmeichhiate thawmhnaw inbel zir loh vang nia chhuanlan an siam ṭhin chu a pawm loh thu a sawi. "Mi ṭhenkhatin hmeichhiate thawmhnaw inbel chungchang an chhuanlam ṭhin anih chuan eng vangin tar te, nausen ten pawngsual an tawh tel ṭhin?" tiin a zawt let bawk.