Serchhip District Sanitation Task Force ṭhukhawm

Serchhip District Sanitation Task Force chu nimin khan Serchhip DC meeting hall-ah an chairman, DC Sangchhin Chinzah hoin an ṭhukhawm a, kum kal meka Mizorama khawpui fai inelna atana an hmalak tawh chinte thlirletin, endiktuten mark an pek dan tur duan sa zulzuia hmabak an la neihte an thlirho.

Sangchhin Chinzah chuan khawpui fai inelna hmasa ber nikum hmasa neihah hnuai takah an awm tih sawiin, "Nasa taka ṭan lain nikumah erawh chuan pahnihna kan ni ta hial. Nikuma kan beih nasatzia chu a hretute vek kan ni. Nikumah pahnihna kan nih tawh avangin kuminah chuan tum pakhat chauh kan nei thei a, chu chu pakhatna nih a ni," a ti. 

Serchhip khawpuia cheng khua leh tui zawng zawngte chu kum 2019 khawpui fai inelna neih chhoh meka pakhatna ni ngei tura inbuatsaiha, ṭan la ṭheuh tura sawmin Serchhip DC chuan, "Serchhip neitu dik tak chu a chhunga cheng mipuite kan ni. YMA, Village Council leh kohhrante chu hmalakna kawnga mi pawimawh an ni, theihtawp an chhuah chuan pakhatna kan ni ngei ang," a ti a, District Sanitation Task Force aṭanga tih theih an neih apiang chu an tih zel tur thu a sawi.

Committee-ah hian member secretary, DUDO Vanthangpuii chuan khawpui fai inelnaa endiktute tehna tur duan­sate sawifiahin, chumi huang chhunga Serchhipa DUDO leh YMA, YMA chhang, kohhran, VC,  zirna-in, adven­ture club leh pawl hrang hrangte nena ṭangruala hma an lo lak tawhnate a tarlang.

Khawpui fai inelna hi chi thumah ṭhen niin category 1-ah khawpui inelna (overall), category 2-ah district khawpui inelna (district capitals) leh category 3-ah khawpui dang (other) inelna a awm. Serchhip hi category 1 leh 2 huangah a tel ang a, an district aṭangin North Vanlaiphai leh Thenzawlte chu Category 1 leh 3-ah an tel thei thung ang. 



Share this Post

Login to comment
No Comments