Census atana inpeih tawh thu puang

Economics & Statistics director Lalrikhuma Sailo chuan nimin khan 7th Economic Census kalpui ṭan turin an inpeih pawh thu a puang.

Lalrikhuma Sailo chuan economic census pawimawhna hrang hrangte a tarlang a, "Kan inpuahchahna leh hma kan lak tawhnaah state ti ṭhate zingah kan la tel zel a, census hna kalpui anih chhung hian thawktute an pawimawh rualin mipuite thawhpuina leh ṭawiawmna a pawimawh hle dawn a ni," a ti. Economic census rintlak leh felfai tak buatsaih a nih theih nan thawktute chu an mawhphurna leh chanvo ṭha tak a hlen turin a chah.

Inkhawm hi jt. director Saithanzuala'n kaihruaiin dy. director B Lalrinhlua leh Common Service Centre asst. manager Frankie Zonunmawiate'n economic census kalpui a nih dan tur an sawifiah.

7th Economic Census hi Digital India zulzuiin paperless a kalpui tur a ni a, mobile application hmangin supervisor 141 leh enumerator 620 te'n Mizoram pumah census hna hi in tina kalin an thawk dawn. Census hi August 22, 2019 aṭangin Mizoramah thawh ṭan a ni a, thil ṭul pawimawh lakkhawmna atan thla thum chhung leh data verification tih nan thla khat leh a chanve dang awh tur a ngaih a ni. 

Economic census kum 5 dana tih ṭhin chu kum thum dana tih tawh tur a ni a, sum siam theihna hmun; sumdawnna in te ber aṭanga lian ber thlengin economic census hian a huam a ni.



Share this Post

Login to comment
No Comments