Taxation department-in kumin chhungin cheng nuai 23,640 an hmu tawh

Taxation department chuan sorkar kum kal mekah July, 2019 thleng khan chhiah chi hrang hrang aṭangin cheng nuai 23,640 an hmu tawh a, kum 2019-20 chhunga an target khûm theih ngei an inbeisei.

Vanglaini palai zawh­na chhangin Taxation commissioner Kailiana Ralte chuan, kuminah chhiah chi hrang hrang aṭangin cheng vbc. 236.4 an hmuh tawh thu a sawi a, "Nikum pawh khan kan target kan khûm a, kuminah pawh thla li chhungin cheng vbc. 236.4 kan hmuh hman avangin kan target cheng vbc. 521 hi kan khûm leh ngei kan beisei," a ti.

Kailiana Ralte chuan, GST aṭanga an sum hmuh a pun telh telh thu sawiin, "Zu zawrh a nih tâk loh avangin VAT 

aṭanga kan sum hmuh chu a tlahniam lo thei lo. GST bakah hian central-a GST tlingkhawm state hrang hrangte hnena sem leh IGST-ah kan pung hle," a ti a; chhiah lâk khawm kawngah theihtawp an chhuah thu a sawi.

Taxation Commis­sioner chuan, duh ang takin GST an la kalpui thei lo tih sawiin, "GST Council meeting apiang­in kalphung an thlak a, khawl leh internet connection lam duhthusam kan la nei ve si lo a, a buaithlak chang a tam. Chutih rualin, GST hman a nih hnuah chhiah kan hmuhte a tam sawt a ni," a ti.

Taxation department-in nikum 2018-19 chhunga chhiah an hmuh tura tuk zat chu cheng vbc. 374 a ni a, an hmuh zawng zawng chu cheng vbc. 580.7 a ni.



Share this Post

Login to comment
No Comments