Mizoram inhung bikna zirho

Nimin khan Aijal Club-ah MZP Gen.Hqrs. huaihawtin, 'Mizoram state inhung bikna zir­chianna programme' hman a ni a, thupui hrang hrang zirho a ni.

Inkhawm hi MZP vice president B Vanlaltána'n a kaihruai a; MZP president L Ramdinliana Renthlei chuan, inhungbikna zir chianna an buatsaih chhan sawiin, "Sorkar lai­puiin Constitution Article 370 leh 35A ṭhiata Jammu & Kashmir state a ṭhen darh vang a ni. Keini Mizote hian India danpui hnuaia hlâwkna hrang hrang min petu leh kan inhung bikna Article 371G leh ILP-te hi a nghîng ve thei ang em tih tih te, kan dinhmunte kan hriat chian theih nante leh Citizenship Amendment Bill chungchangte Mi­zoram mipuiin kan la hre reng a ni tih lantir nante buatsaih a ni," a ti.

MZP President chuan, Mizo zingah tlawm­ngaihna leh hnam hmangaihna a ral tial tial tih sawiin, "Chîm ral kan hlauh tlat chuan tumahin min chîm ral thei lo ang. Hnam tlém kan nih avang leh kan hnam kan la inpeih loh avangin thliarkar rilru pua kan inhung bik ngar ngar rih a ngai. He programme hian Mizo hnam inhung bikna leh inhumhimnate hi a nghîng ta a ni tih a entir a, hei hi nghing lo se chuan programme hi buatsaih a ngai lo ang," a ti a; a chhe zawnga Mizote eitu leh dodâltute chu hneh zel thei tura ṭan rual a ngaih thu a sawi.

Zirhonaah hian Lal­khama, IAS (Rtd.)-in Article 371G chungchang a sawi a; MZP legal adviser T Lalnunsiama'n ILP chungchang sawiin, Central YMA general secretary Lalhmachhuana'n CAB chungchang an sawi thung.



Share this Post

Login to comment
No Comments