Bru hruai kîrte chenna atan Ram pek tur a awm lo

Ministry of Home Affairs thu angin Mizoram sorkar chu Tripura refugee camp-a Bru awm mek, Mizoram khua leh tui dik takte hruai kîr turin a inbuatsaih mek. Hetih lai hian, Bru hruai kîrte Kolasib district-a dah an tumna khuaa village council-te chuan Bru-te hnena ram pek tur an neih loh thu an sawi.

Home department hotute hnen aṭanga Vanglaini thu dawn danin, Bru la lêt tur hian Mizoram sorkar chu kawng hrang hrangin a inbuatsaih zel a; hruai kîr hna thawh hun tur tihchian a la ni lo. Ruahmanna siam lailâwk dan chuan, October 10, 2019 aṭangin lâk lêt hna thawh ṭan tura tih a ni a, tihdanglam leh theih a la ni thung.

Tripura relief camp-a Bru-te Mizoram khua leh tui dik tak an nih leh nih loh enfiah hna chu July 3-20, 2019 chhung khan Mizoram sorkara official-te’n an thawk a, chhungkaw 4,323-te chuan Mizorama lêt an duh thu an lo hrilh. Endik tawh zinga chhungkaw 350-te chu Mizorama enfiah ṭhat leh tura tih a ni.

Tripura relief camp-a Bru-te chu district pathum - Kolasib, Mamit leh Lunglei district-a anmahni khaw ngaiah ṭheuh dah leh tum a ni a; chutih laiin, chhungkaw 822 dahna tura ruahman Kolasib district-a khaw hrang hrangte chuan Bru-te tan ram pek tur an neih tawh loh thu an sawi.

Bru-te dahna tura tih V/C hruaitute chu tun hnai khan Kolasib DC Zoengsanga hoin an ṭhukhawm a; V/C-te chuan Bru-te tan ram pek tur an neih loh thu DC hnenah an thlen a ni.

Ram la awmte chu mimal ram a ni deuh vek tawh a, mimal ram ni lo pawh forest plantation vek a nih thu sawiin V/C-te chuan, “Khuaa chêng mekte pawhin Bru-te pek tura tih ang zat zat chu insem tur kan nei lo,” an ti. Bru, Mizorama kîrte chu in an sakna tur ram ft. 40-a sei leh ft. 30-a zau pek tura tih a ni.

Hetih lai hian, Tripura refugee camp-a Bru awmte chungchanga din Joint Monitoring Group (JMG) member-te June 2019-a Ministry of Home Affairs pisaa ṭhukhawm chuan, Bru-te chu September 2019 chhungin Mizorama lâk lêt vek a, Tripura refugee camp-te pawh October 1, 2019-ah chuan tihtawp vek tawh turin an lo rêl tawh a ni.



Share this Post

Login to comment
No Comments