Lunglei MJA-in ATL Road an enfiah

MJA, Lunglei district member-te chuan PWD hotute leh kawng siamtu contractor-te nen nimin khan Aizawl - Lunglei via Thenzawl (ATL) World Bank Road an enfiah a; lirthei chi tin tana tlân hrehawm lutuka chhia a awm loh laiin, kawng khuar hnawh ngai hmun tam takah a awm thu an tarlang.

Lunglei MJA chuam, "PWD, Lunglei Division huam chin ATL Road-ah lirthei chi tin tana tlan hrehawm lutuk kawng chhia a awm loh laiin, kawng khuar neuh neuh hnawh ngai hmun tam takah a awm. Kawng khuar thawm ṭhat ngaite hi hna thawktu contractor-te'n a hmunah awm chilhin an thawk mek. Tuna kawng thawm ṭhatna thawk mektu contractor pahnih hian anmahni sum sêngin an thawk kal mek a, sum hi SASCI 2023-24 aṭanga pek turin agreement an ziak niin an sawi," an ti.

Aizawl-Lunglei World Bank Road hi kum 2010-a siam zawh a nih hnuah kum 2019 aṭanga 2022 thleng khan Lunglei PWD Division chan chin, Lunglei aṭanga km. 64-na thleng chu Bhavya Construction-in resurfacing hna an thawk a; Bhavya-in hna an thawh duh tak loh hnuah an security deposit cheng nuai 193 hmangin PWD Lunglei Division-in an huam chhung chin an thawm ṭha a ni.

PWD, Lunglei Road Division hian ATL Road-a lirthei tlan dan tlangpui hriat nan October 2022 khan traffic counting neiin, lirthei tlan zat an chhinchhiah a; kawngpui chu ni tin lirthei chi hrang hrang 1,000 chuangin an zawh bakah, lirthei lian quintal 300 aia rit phur 400 chuangin ni tin an zawh a ni.

Rit phur lirtheiin ni tina an zawh dan aṭangin, lei chhung aṭanga kawng chhah zawng chu milimetre 380 aṭangin 480-a chhaha siam a ngaih tawh thu PWD hotute chuan an sawi.