Anti-Dengue Month hman a ni

Health Services department buatsaihin nimin khan Health Services directorate conference hall-ah Anti-Dengue Month hman a ni a, Health & Family Welfare Board vice chairman Dr ZR Thiam­sanga, MLA-in a hmanpui. He hunah hian kumin January aṭanga June thla thlengin dengue vei mi 10 hmuh a nih tawh thu an tarlang.

Anti-Dengue Month hmanna hi Health Services director Dr Lalchungnunga'n a kaihruai a; Dr ZR Thiamsanga chuan, hmun kilkhâwr berte pawhin mithiam­te thiamna an chhawr ngei theih nan primary health care tihchangtlun tumin sorkarin hma a lak mek thu a sawi a, "Hriselna hi state mawhphurhna a ni a, chu vang chuan intluk tlang taka inenkawlna ṭha kan dawn vek theih nan hriselna atana mamawhte tihphuisui a, thuam chak hi kan tihmâkmawh a ni," a ti.

Dr ZR Thiamsanga chuan, Health Care Scheme chu company ruai loin sorkarin changtlung zawka kalpui a tum tih sawiin, "October thlaah chuan he scheme hi mipuite'n an chhawr theih nan chak taka hmalak mek a ni," a ti. Dengue do thla bul ṭanna hman a ni chu lawmawm a tih thu sawiin, "July thla hi Anti-Dengue Month ni mah se, July thlaah chauh loh pawh dengue do hna kan thawh a ṭul," a ti a; invenna ngaih pawimawh a, in leh a vel vawn fai te, thosi lên zàr 

ṭhatte a pawimawh thu a sawi.

Inkhawmah hian Mizoram State Vector Born Diseases programme-a state programme officer Dr Lalhlimpuia'n dengue chungchang a sawifiah. Dengue chu a paitu thosiin mi a seh 

aṭanga ni 5-6 velah a lang chhuak ṭhin tih sawiin, "Khawsik sang tak, ruh leh tihrâwl ná, mitmu ná leh khaw ênga men harsa, taksa pêng ṭhenkhat aṭanga thi chhuak, thak, bawl sen leh vual, lu ná leh luaktein a lang chhuak thei. Hetianga kan awm a nih chuan mithiamte râwn vat tur a ni," a ti.

Dr Lalhlimpuia chuan, dengue thlentu thosi an pian tam loh nan in leh a velte tihfai ṭhat a ṭul thu te, tui tlin theihna motor ke chhia, bûr, etc. te tihchhiat leh tuizémte chhin phui ṭhat a ṭul thu te, mutnaa thosi lên zâr ṭhat te, thosi hlauh chi hrang hrang hmante a ṭhat thu a sawi bawk.

Dr Lalhlimpuia sawi danin, January-June 2019 chhungin Mizoramah dengue kai nia rinhlelh mi 146 enfiah an ni tawh a, chu'ng zinga mi 10 chuan dengue an vei a ni. Dengue vanga thi an la awm lo.

Anti-Dengue Month hawnnaah hian National Health Mission-a mission director Dr Eric Zomawia pawhin thu sawiin, Mizoramah health promotion center neih ve thuai châkawm a tih thu a sawi a, "Mi tinin hriselna ṭha an dawn theih nan thawhhona ṭha kan neih zel a pawimawh," a ti.



Share this Post

Login to comment
No Comments