MZU inthlahna HTE Minister-in hmanpui

Mizoram University chuan nimin khan an zirlai chhuak turte thlahna inkhawm, MZU Auditorium-ah an hmang a, Higher & Technical Education minister Dr R Lalthangliana'n a hmanpui.

HTE Minister chuan, June 2, 2001-a din MZU chu MNF leh India inremna, Peace Accord-in a ken telte zinga mi a nih thu sawiin, "Remna thuthlunga kan neih a nih avangin a hlawhtling ta hi lawmawm hle. NAAC-in inspection a neihah MZU hi 'A' grade-ah a kai a, University overall ranking-ah pawh 94-na kan hauh pha a, MHRD hnuaia awm NIRF 2017-a tehnaah pawh India ram pumah 58-na kan ni bawk a, a ropui hle a ni," a ti.

Dr R Lalthangliana chuan, Mizoram pumah MZU affiliated college 28 a awm mek tih sawiin, "Tichangtlung zel turin hma kan la ang. MZU aṭanga chhuakte reng reng chu chhawr tlak ni turin ka chah che u a ni," a ti a; MZU-ah cource pawimawh tak tak hawn thar tul a la tih thu sawiin, course hawn thar lamah chak taka hma la turin MZU hotute a chah.

Minister Dr R Lal­thangliana hian July 9, Thawhlehni zan khan ZONET, MDM leh DELTA Sound-te'n BSUP Housing Complex chima thi leh hliamte chhawmdawlna atana Charity Live Concert an buatsaih a hmanpui bawk a; chhiat tâwkte ṭanpui nan concert-ah hian Rs. 30,000 a thawh ve nghal a ni.



Share this Post

Login to comment
No Comments