MPYCC-in ramri zùzîsan lo turin sorkar phût

Congress party ṭhalaite chuan thuchhuah siamin, Mizoram leh Assam ramri chungchang chu ṭum dang anga zùzîsan tawh lo a, huaisen taka hma lam pan turin MNF sorkar an phût.

Mizoram Pradesh Youth Congress Committee (MPYCC) chuan, Mizo mipui náwlpuiin Assam nena ramri an pawm theih loh tur, Northeast Areas Reorganisation Act,1971, MNF Accord 1986, State of Mizoram Act, 1986 anga Assam lamin remchanga hmanga Mizoram an nêk tlat chu rilru nat thlak an tih thu an sawi.

MPYCC tarlan danin, ramri buai chinfel chungchang chu MNF dintu Laldenga'n, 'Kan sa lu hawn tur' tia awlsam taka chinfel mai turin a sawi a; mahse, ramri chu an sawifel lo mai ni loin, India sorkar nen Memorundum of Settlement an ziahah mizo mipui duh dan kalhin North East Reorganisation Act, 1971-in Mizoram ramri atana a tih chin chu MNF-in an pawm ta zawk a, chu chu MoS 4.3(1)-ah a chuang a ni.

NE Areas Reorganisation Act, 1971 chu MNF-te'n an pawm avangin an sorkar laiin ramri chungchang an ngaihthah ṭhin nia sawiin MPYCC chuan, "MZP-te'n sorkar koh eih nan June 20, 2007-a Vairengte dáia Zorûn an sak chu MZP-te Vairengte pawh an chhuahsan hmain Mizoram sorkarin a police-te a ṭhiahtir a ni. MNF sorkar khan 

ṭhangtharte'n an dem ang tih hlauin, 'Zorûn an sakna lai hi Assam Forest Reserve Area a ni a, Bagha leh Lailapur mipuite'n nasa taka an complaint avangin Assam Forest hnathawkte'n an ṭhiat' tiin Vairengte Police Station-ah an record a ni," an ti.

MPYCC tarlan danin, March 8, 2006-a Assembly House-a B Lalthlengliana private resolution, 'Mizoram leh a ṭhenawmte state inkar ramri chinfel ngai laite chingfel turin sorkar laipuiin Boundary Commission din thuai rawh se,' tih chu lungrual taka pass a ni a; sorkar laipuia memorundum thehluh tura July 30, 2007-a peih tawh chu, thehlut loin an tizùzî a ni.

Congress ṭhalaite chuan, July 8, 2019-a MNF sorkar Cabinet meeting-in Mizoram ramri atana Inner Line Regulation 1875 a pawm ta chu lawmawm an tih rualin, an chêt tawh dan enin a ngaihṭhatthlak loha an hriat thu an tarlang.

MPYCC chuan, "Mizoram chin, British sorkar leh Lusei lalte inremna awm tawh sa, Bengal Eastern Frontier Regulation, 1875 / The Innerline of the Southern Frontier district of Cachar 1875, India Foreign department no. 2299P dated 20th. August, 1875-in notification a chhuah tawh, ramri lung phunna tur uluk taka an thlan leh lungphun 46 an lo phun hnan tawhna anga ṭan khawh tlat a, zûzîsan tawh lo a, huaisen taka hma lam pan turin kan phût a ni," an ti.



Share this Post

Login to comment
No Comments