Mizoramin hmasawn turin Mamawh dang a nei lo - CM

Mizoram DIET Faculty Council (MDFC) chuan nimin khan Hotel Regency-ah inkhawmpui an hmang a; khuallian Zoramthanga, Chief Minister chuan, hmasawnna turin Mizo­ramin tuna a neih bak mamawh dang a neih loh thu a sawi.

Chief Minister chuan, hmasawn tura Mizoramin ro (asset) a neihte sawiin, "Ram zau ṭha tak te, ruahtui ṭha te, sik leh sa nuam tak te, lei hnuaia gas te, a chhunga cheng tam zawk lehkhathiam te, ṭawng khat hmang kan nihnate hi a ni. Hmasawn tur chuan heng aia beisei tur dang kan mamawh lo. A pawimawh ber zawk chu, heng kan asset neihte hi ram intodelh leh hausa kan nih theih nana hmang ṭangkai tura thiamna leh rilru thlak danglam a ni," a ti.

DIET lecturer kalkhawmte chu ramin zirna lama hma a sawn nan theihtawp chhuaha thawhpuiah sáwmin Zoramthanga chuan, "In service chungchanga harsatna in neihte pawh uluk taka sorkara mithiamte nen inráwn chunga ngaihtuahsak in ni dawn," a ti. DIET lecturer-te chu mithiam kalkhawm an nih avang leh zirlai zirtirtu turte hnena thiamna hlân chhâwngtu an nih avangin, mi ngaihtuahna leh rilru sûkthlêk kaihhruai kawngah mawhphurhna an neih thu a sawi.

Khualzahawm Lal­chhandama Ralte, School Education minister pawhin thu sawiin, zirna leh hriselna tihhmasawn chu sorkar ngaih pawimawh berte zinga mi a nih thu a sawi a, "Hmasawnna ruangám ṭha tak taka din ni mah se, a hmang ṭangkaitu tur mihring ber tihhmasawn an nih loh a, human resource ṭha kan neih loh chuan hmasawnna a rualkhai loin awmzia a nei thui dawn lo a ni," a ti. 

School Education Minister chuan, DIET lecturer zingah M.Ed. nei duhthusama an tam tâwk loh thu leh doctorate nei an tlem thu sawiin, hun lo kal zel turah zirna sang zawk duh belh zel a nih dawn avangin, tuna thawk mekte chu zir zawm tumna rilru nei yurin a fuih a; study leave an neih loh avanga harsatna awm thei chu a hriatpui thu a sawi.



Share this Post

Login to comment
No Comments