Lawngtlai MJA-te'n Damdawi-in sak mek an enfiah

Lawngtlai District Hospital building thar tur, Rs. 11,91,51,000 sênga sak mek chu nimin khan Lawngtlai District MJA member-te'n an tlawh a; hna thawh tur zinga 85% zawh a nih tawh thu, a enkawltu PWD hotute'n an lo hrilh.

Khum 50 awm theihna tur damdawi-in sak mek an enfiahnaah hian MJA-te chuan, damdawi-in tuala septic tank leh tuizém tur siam mek chu a inhnaih lutuka an hriat thu an sawi a; PWD hotute'n thil awm dan an sawifiah hnuah, Medical Superintendent leh PWD hotute inberáwnin, septic tank chu sawn turin an rél.

MJA member-te chuan, wheelchair nawrna tur ramp chu a ṭhen laiah a kûl a, a rinawm tâwk lo deuha an hriat thu an sawi a; PWD hotute chuan an enfiah zui tur thuin an chháng.

Lawngtlai District Hospital sak mek hi square metre 1,204.54-a zau a ni a, May 4, 2017-ah sak ṭan niin, kum hnih chhunga zawh tura tih a ni. Hun tiamah an sak zawh hman loh vangin contractor Zahnuna, Zemabawk, Aizawl chuan hna thawh hun a dil belh mek.

Damdawi-in thar tur sak mek hian operation theatre, nau neihna pindan leh x-ray room-te a keng tel lo a, chuvang chuan, khum 27 awm theihna an luah lailawk mek OPD building chu rin tura tih a ni. He hospital hian quarters panga  a keng tel. 



Share this Post

Login to comment
No Comments